കൊച്ചി: കണ്ടെയ്‌നര്‍ ലോറിക്കു തീ പിടിച്ചത് പരിഭ്രാന്തി പടര്‍ത്തി. ഇന്നലെ രാവിലെ ഇടപ്പള്ളി-ചങ്ങമ്പുഴ പാര്‍ക്കിനു സമീപമായിരുന്നു അപകടം. ഓടിക്കൊണ്ടിരിക്കവേ വൈദ്യുതി ലൈനില്‍ തട്ടിയാണ് തീപിടിത്തമുണ്ടായത്.
ചങ്ങമ്പുഴ പാര്‍ക്കിനു പിന്നിലുള്ള തണ്ണീര്‍പാലം ഗണപതി കോവിലിന് മുന്നിലെ റോഡിലൂടെ പോകുമ്പോഴായിരുന്നു അപകടം. കോംപ്ലിമെന്ററി ബാഗുകള്‍ നിറച്ചിരുന്ന കണ്ടെയ്‌നര്‍ ലോറിയിലാണ് തീ പടര്‍ന്നത്. എളമക്കര പൊലിസും അഗ്‌നിശമന സേനയുടെ മൂന്നു യൂണിറ്റുകളും സ്ഥലത്തെത്തി തീയണച്ചു.
ഗാന്ധിനഗര്‍, തൃക്കാക്കര അഗ്‌നിശമന സേന യൂനിറ്റുകളാണ് തീ അണയ്ക്കാന്‍ എത്തിയത്. കണ്ടെയ്‌നര്‍ നിര്‍ത്തിയിട്ടതോടെ ഇടപ്പള്ളി പ്രദേശത്ത് ഏറെനേരം ഗതാഗത തടസമുണ്ടായി. അതിവേഗം തീ കെടുത്താനായതിനാല്‍ മറ്റു സ്ഥലങ്ങളിലേക്കു വ്യാപിക്കുന്നത് തടയാന്‍ സാധിച്ചു.