തിരുവനന്തപുരം: സംസ്ഥാനത്ത് മൂന്ന് പേര്‍ക്ക് കൂടി കോവിഡ് 19 വൈറസ് ബാധിച്ചതായി സ്ഥിരീകരിച്ചു. മലപ്പുറത്ത് രണ്ട് പേര്‍ക്കും കാസര്‍കോട് ഒരാള്‍ക്കുമാണ് രോഗം സ്ഥിരീകരിച്ചത്. ഇതോടെ സംസ്ഥാനത്തെ രോഗബാധിതരുടെ എണ്ണം 24 ആയതായി മുഖ്യമന്ത്രി പിണറായി വിജയന്‍ വാര്‍ത്താസമ്മേളനത്തില്‍ അറിയിച്ചു.

ഇന്ന് സ്ഥിരീകരിച്ചവരെല്ലാം വിദേശത്ത് നിന്ന് വന്നവരാണ്. സഊദി, ദുബൈ എന്നിവിടങ്ങളില്‍ നിന്ന് വന്നവരെ വീടുകളില്‍ നിരീക്ഷണത്തില്‍ വെച്ചതായിരുന്നു. അതില്‍ മൂന്ന് പേര്‍ക്കാണ് രോഗം സ്ഥിരീകരിച്ചത്.

സഊദിയില്‍ നിന്ന് ഉംറ കഴിഞ്ഞെത്തിയവരാണ് മലപ്പുറത്തെ രണ്ടുപേരും. അതുകൊണ്ടുതന്നെ വിമാനത്താവളത്തില്‍ നിന്ന് നേരിട്ട് ഐസൊലേഷന്‍ വാര്‍ഡിലേക്ക് മാറ്റുകയായിരുന്നു. മഞ്ചേരി മെഡിക്കല്‍ കോളേജ് ആശുപത്രിയിലെ ഐസലേഷന്‍ വാര്‍ഡിലാണ് ഇവര്‍ ചികിത്സയിലുള്ളത്.

ആകെ 12470 പേരാണ് ഇപ്പോള്‍ നിരീക്ഷണത്തിലുളളത്. ഇന്ന് 72 പേരെയാണ് ആശുപത്രിയില്‍ പ്രവേശിപ്പിച്ചത്. ജൂനിയര്‍ മെഡിക്കല്‍ വിദ്യാര്‍ഥികള്‍ക്ക് അവധി നല്‍കും. വിമാനത്താവളങ്ങളില്‍ തിരക്ക് കുറക്കണം. ടൂറിസ്റ്റുകളോട് മാന്യമായി പെരുമാറണമെന്നും മുഖ്യമന്ത്രി പറഞ്ഞു.