ഗുവാഹത്തി: പൗരത്വ (ഭദഗതി)ബില്ലിനെതിരേ വടക്കുകിഴക്കന്‍ സംസ്ഥാനങ്ങളിലെ പ്രതിഷേധങ്ങള്‍ക്ക് മുന്നില്‍ കുഴങ്ങി ബി.ജെ.പി. പ്രതിഷേധങ്ങള്‍ ദിനംപ്രതി ശക്തമാവുന്നതോടെ സഖ്യകക്ഷികള്‍ നഷ്ടമാവുമോയെന്ന ഭീതിയിലാണ് പാര്‍ട്ടി. രാജ്യസഭയില്‍ ബില്‍ അവതരിപ്പിക്കാനിരിക്കെ, ഈ സംസ്ഥാനങ്ങളില്‍ പ്രതിഷേധം വ്യാപകമാവുകായണ്.

ബി.ജെ.പി ഭരിക്കുന്ന അസമിലെ പ്രതിഷേധങ്ങള്‍ അഞ്ചാം ആഴ്ചയിലേക്ക് കടന്നു. ബില്ലിനെ എതിര്‍ത്തുള്ള പ്രതിഷേധങ്ങളില്‍ കോണ്‍ഗ്രസും പാങ്കാളികളാണ്. ബില്ലിനെ എതിര്‍ക്കുന്ന വടക്കുകിഴക്കന്‍ സംസ്ഥാനങ്ങളിലെ ബി.ജെ.പി സഖ്യകക്ഷികള്‍ ഉള്‍പ്പെടെയുള്ള പാര്‍ട്ടികള്‍ക്കൊപ്പം ജനതാദള്‍(യു) കഴിഞ്ഞ ദിവസം ചേര്‍ന്നിരുന്നു. വടക്കു കിഴക്കന്‍ സംസ്ഥാനങ്ങളിലെ ജനങ്ങളെ പ്രതികൂലമായി ബാധിക്കുന്നതാണ് ബില്ലെന്ന് മിസോറം മുഖ്യമന്ത്രി സോറംതങ്ക കഴിഞ്ഞ ദിവസം വിളിച്ചുചേര്‍ത്ത യോഗത്തില്‍ പറഞ്ഞിരുന്നു.

ബില്ല് രാജ്യസഭയില്‍ അവതരിപ്പിക്കുകയാണെങ്കില്‍ പാര്‍ട്ടി വിടുമെന്ന് മേഘാലയയിലെ രണ്ട് ബി.ജെ.പി നിയമസാമാജികര്‍ ഭീഷണിപ്പെടുത്തിയിരുന്നു. രാജ്യസഭാ ബില്ലിന് അനുകൂലമായി വോട്ട് ചെയ്യരുതെന്ന് എന്‍.ഡി.എ സഖ്യകക്ഷികളോട് അഭ്യര്‍ഥിക്കാനായി മേഘാലയ മുഖ്യമന്ത്രി കോണ്‍റഡ് സാഗ്മയുടെ നേതൃത്വത്തിലുള്ള സംഘം നിലവില്‍ ഡല്‍ഹിയിലുണ്ട്.

25 ലോക്‌സഭാ സീറ്റുകളുള്ളതിനാല്‍ വടക്കുകിഴക്കന്‍ സംസ്ഥാനങ്ങള്‍ ബി.ജെ.പിക്ക് നിര്‍ണായകമാണ്. 2014ല്‍ നടന്ന തെരഞ്ഞെടുപ്പില്‍ എട്ട് സീറ്റുകളില്‍ ബി.ജെ.പി ജയിച്ചു. നാല് സീറ്റുകള്‍ ബി.ജെ.പിയുടെ സഖ്യകക്ഷികള്‍ നേടിയിരുന്നു.