തലശ്ശേരി: എരഞ്ഞോളി തോട്ടുമ്മലില്‍ റേഷന്‍കട ഉടമയ്‌ക്കെതിരേ മാവോയിസ്റ്റ് ലേബലില്‍ പെയിന്റുകൊണ്ട് എഴുതിയ നിലയില്‍. എന്‍.പി ശശിധരന്റെ 75ാം നമ്പര്‍ റേഷന്‍ കടയ്‌ക്കെതിരെയാണ് ഇന്നലെ രാവിലെ കടയുടെ നിരപ്പലകയില്‍ എഴുത്ത് പ്രത്യക്ഷപ്പെട്ടത്.
തെറിയഭിഷേകത്തോടൊപ്പം മാവോയിസ്റ്റ് എന്ന് ഇംഗ്ലിഷില്‍ വലിയ അക്ഷരത്തില്‍ എഴുതിയിട്ടുണ്ട്. സംഭവത്തില്‍ ധര്‍മടം എസ്.ഐ എ.വി.കെ പ്രകാശിന്റെ നേതൃത്വത്തില്‍ കേസെടുത്ത് അന്വേഷണം ആരംഭിച്ചു. റേഷന്‍ കടയിലെ ഇ പോസ് ഇന്റര്‍നെറ്റ് ലഭിക്കാത്തതിനെ തുടര്‍ന്ന് റേഷന്‍ ലഭിക്കാത്ത ഒരാളാണ് ഇത്തരത്തില്‍ തെറി അഭിഷേകം നടത്തിയതെന്നാണ് പൊതുസംസാരം. ചുവന്ന പെയിന്റ് ഉപയോഗിച്ചാണ് എഴുതിയിരിക്കുന്നത്. ഭീഷണി എഴുത്തുമായി മാവോയിസ്റ്റ് സംഘടനകള്‍ക്ക് ബന്ധമുണ്ടാവില്ലെന്നാണ് പൊലിസിന്റെ പ്രാഥമിക നിഗമനം.
സംഭവത്തില്‍ സമീപത്തെ കടകളിലുള്ള സി.സി.ടി.വി ദൃശ്യങ്ങളും പരിശോധിക്കും.