മലപ്പുറം: വിദ്യാഭ്യാസ മേഖലയിലെ മികച്ച പ്രവര്‍ത്തനത്തിനുള്ള പ്രഥമ കൊളത്തൂര്‍ മൗലവി എജ്യുക്കേഷണല്‍ ട്രസ്റ്റ് (കെ.എം.ഇ.ടി) വിദ്യാഭ്യാസ അവാര്‍ഡ് വയനാട് മുട്ടില്‍ മുസ്‌ലിം ഓര്‍ഫനേജ് സെക്രട്ടറി എം.എ മുഹമ്മദ് ജമാലിന്. വിദ്യാഭ്യാസ വിചക്ഷണനും മുന്‍ പി.എസ്.സി അംഗവും രാഷ്ട്രീയ സാമൂഹ്യ സാംസ്‌കാരിക രംഗത്തെ പ്രമുഖ വ്യക്തിത്വവുമായിരുന്ന കൊളത്തൂര്‍ ടി. മുഹമ്മദ് മൗലവിയുടെ സ്മരണാര്‍ത്ഥം ട്രസ്റ്റ് ഏര്‍പ്പെടുത്തിയതാണ് പുരസ്‌കാരം.
വയനാടിന്റെ വിദ്യാഭ്യാസ-സാംസ്‌കാരിക രംഗത്തെ സംഭാവനകള്‍ പരിഗണിച്ചാണ് മുഹമ്മദ് ജമാലിന് പുരസ്‌കാരം നല്‍കുന്നത്. കെ.പി.എ മജീദ്, സലീം കുരുവമ്പലം, ടി.എ അഹമ്മദ് കബീര്‍ എം.എല്‍.എ, സി.പി സൈതലവി, ഉമ്മര്‍ അറക്കല്‍ എന്നിവരടങ്ങിയ ജൂറിയാണ് അദ്ദേഹത്തെ അവാര്‍ഡിനായി പരിഗണിച്ചത്.