കുട്ടനാട്: രണ്ടു പടക്കനിര്‍മാണ ശാലകളിലുണ്ടായ തീപിടിത്തത്തില്‍ സ്ത്രീ പൊള്ളലേറ്റു മരിച്ചു. ആറുപേരുടെ നില ഗുരുതരം. പുളിങ്കുന്ന് കിഴക്കേച്ചിറയില്‍ കുഞ്ഞുമോള്‍ (55) ആണ് മരിച്ചത്. 

കുട്ടനാട്ടില്‍ പുളിങ്കുന്ന് പഞ്ചായത്ത് എട്ടാം വാര്‍ഡില്‍ പുരയ്ക്കല്‍ കൊച്ചുമോന്‍ ആന്റണി എന്നയാളുടെ ലൈസന്‍സില്‍ പ്രവര്‍ത്തിക്കുന്ന നിര്‍മാണശാലകള്‍ക്കാണ് ഇന്നലെ ഉച്ചയ്ക്ക് 2.20ഓടെ സ്‌ഫോടനത്തെ തുടര്‍ന്ന് തീപിടിച്ചത്.

 അഞ്ചു മീറ്റര്‍ അകലത്തില്‍ സ്ഥിതിചെയ്യുന്ന പടക്കനിര്‍മാണ ശാലകളിലുണ്ടായ ഉഗ്രസ്‌ഫോടനത്തില്‍ തൊഴിലാളികളായ ഒന്‍പത് പേര്‍ക്കു പൊള്ളലേറ്റു. ഇവരില്‍ ഏഴുപേര്‍ സ്ത്രീകളാണ്. പുളിങ്കുന്ന് കരിയില്‍ചിറയില്‍ ഏലിയാമ്മ തോമസ് (തങ്കമ്മ- 52), പുളിങ്കുന്ന് കണ്ണാടി ഇടപ്പറമ്പില്‍ വിജയമ്മ (56), പുളിങ്കുന്ന് കായപ്പുറം മുളവനക്കുന്നത്ത് സിദ്ധാര്‍ത്ഥന്‍ (61), പുളിങ്കുന്ന് കിഴങ്ങാട്ടുത്തറ സരസമ്മ (56), പുളിങ്കുന്ന് തോട്ടാത്തറ ഓമന (49), പുളിങ്കുന്ന് മുപ്പതില്‍ റെജി (50), പുളിങ്കുന്ന് പുത്തന്‍പുരക്കല്‍ ചിറയില്‍ ഷീല (48), പുളിങ്കുന്ന് മലയില്‍ പുത്തന്‍വീട്ടില്‍ ബിനു (30), പുളിങ്കുന്ന് കന്നിട്ടചിറയില്‍ ബിന്ദു (42),  എന്നിവര്‍ക്കാണ് പരുക്കേറ്റത്. ഇവരില്‍ സിദ്ധാര്‍ത്ഥന്‍, ഓമന എന്നിവരൊഴികെയുള്ളവരുടെ നില ഗുരുതരമാണ്. 60 ശതമാനത്തിനു മുകളില്‍ ഇവര്‍ക്കു പൊളളലേറ്റിട്ടുണ്ട്.സ്‌ഫോടനത്തെ തുടര്‍ന്ന് സമീപത്തെ കെ.എസ്.ഇ.ബി. ഓഫിസില്‍ നിന്നെത്തിയ ജീവനക്കാരും നാട്ടുകാരുമാണ് രക്ഷാപ്രവര്‍ത്തനത്തിന് ആദ്യം നേതൃത്വം നല്‍കിയത്. ആലപ്പുഴ, ചങ്ങനാശ്ശേരി എന്നിവിടങ്ങളില്‍ നിന്ന് അഗ്നിശമനസേനയും പുളിങ്കുന്ന് പൊലിസും സ്ഥലത്തെത്തിയിരുന്നു. പരുക്കേറ്റവരെ ആദ്യം പുളിങ്കുന്ന് താലൂക്ക് ആശുപത്രിയിലെത്തിക്കുകയും പിന്നീട് വണ്ടാനം മെഡിക്കല്‍ കോളജ് ആശുപത്രിയിലേക്കു മാറ്റുകയുമായിരുന്നു. ഈ സ്ഥാപനങ്ങള്‍ക്ക് ലൈസന്‍സ് വില്‍പ്പനയ്ക്കു മാത്രമാണുണ്ടായിരുന്നതെന്നാണ് ഉദ്യോഗസ്ഥര്‍ പറയുന്നത്. ആലപ്പുഴ എ.ഡി.എം ബി. ഹരികുമാര്‍, ആര്‍.ഡി.ഒ എസ്. സന്തോഷ്, കുട്ടനാട് തഹസില്‍ദാര്‍ ടി.ഐ വിജയസേനന്‍ എന്നിവരുടെ നേതൃത്വത്തിലുള്ള ഉദ്യോഗസ്ഥര്‍ സ്ഥലത്തെത്തിയിരുന്നു.മാര്‍ച്ച് 31ന് കാലാവധി തീരുന്ന പടക്കവില്‍പ്പനയ്ക്കുള്ള ഒരു ലൈസന്‍സ് മാത്രമേ ഉണ്ടായിരുന്നുള്ളൂ. അതുപ്രകാരം അഞ്ചു കിലോഗ്രാം നിര്‍മിച്ച പടക്കവും 25 കിലോഗ്രാം ഫാന്‍സി പടക്കവും വില്‍ക്കാന്‍ മാത്രമേ അനുവാദമുള്ളൂ.എന്നാല്‍ അഞ്ഞൂറ് കിലോയിലേറെ കരിമരുന്ന് ഇവിടെ സംഭരിച്ചിരുന്നതായാണ് വിവരം.