മാവേലിക്കര: എസ്.എന്‍.ഡി.പി യോഗം മാവേലിക്കര യൂണിയനില്‍ 2006 മുതല്‍ 2019 വരെയുള്ള വര്‍ഷങ്ങളില്‍ നടന്ന മൈക്രോഫിനാന്‍സ് ഉള്‍പ്പെടെ 11 കോടി രൂപയുടെ സാമ്പത്തിക ക്രമക്കേടുകളുടെ രേഖകള്‍ക്കായി മുന്‍ ഭാരവാഹികളുടെ വീട്ടില്‍ ക്രൈംബ്രാഞ്ച് റെയ്ഡ് നടത്തി.

മുന്‍ പ്രസിഡന്റും കേസിലെ ഒന്നാം പ്രതിയും നിലവിലെ സ്‌പൈസസ് ബോര്‍ഡ് ചെയര്‍മാനുമായ സുഭാഷ് വാസു, മുന്‍ സെക്രട്ടറിയും രണ്ടാം പ്രതിയുമായ സുരേഷ് ബാബു, മുന്‍ യൂണിയന്‍ ഓഫിസ് ഉദ്യോഗസ്ഥരായ രേവമ്മ, ശശികല എന്നിവരുടെ വീട്ടിലാണ് ഒരേസമയത്ത് റെയ്ഡ് നടന്നത്. മാവേലിക്കര ജുഡീഷ്യല്‍ ഒന്നാം ക്ലാസ് മജിസേ്ട്രറ്റ് കോടതിയില്‍ നിന്നുള്ള സെര്‍ച്ച് വാറണ്ട് പ്രകാരമായിരുന്നു റെയ്ഡ്.സുഭാഷ് വാസു, സുരേഷ് ബാബു എന്നിവരെ ചോദ്യം ചെയ്യാന്‍ ക്രൈംബ്രാഞ്ച് മുമ്പ് നോട്ടിസ് നല്‍കിയിരുന്നെങ്കിലും അവര്‍ ഹാജരായിരുന്നില്ല. ക്രൈംബ്രാഞ്ച് അഡീഷണല്‍ ഡയരക്ടര്‍ ജനറല്‍ ടോമിന്‍ ജെ. തച്ചങ്കരിയുടെ നിര്‍ദേശപ്രകാരം ഐ.ജി എസ്. ശ്രീജിത്തിന്റെ മേല്‍നോട്ടത്തിലാണ് റെയ്ഡ് നടപടികള്‍ ആവിഷ്‌കരിച്ചത്. 

ക്രൈംബ്രാഞ്ച് ജില്ലാ പൊലിസ് സൂപ്രണ്ട് പ്രകാശന്‍ കാണിയുടെ നേതൃത്വത്തില്‍ നടന്ന റെയ്ഡില്‍ നിര്‍ണായക തെളിവുകളടങ്ങുന്ന സുപ്രധാന രേഖകള്‍ പിടിച്ചെടുത്തിട്ടുണ്ട്. ക്രൈം ബ്രാഞ്ച് ഡിവൈ.എസ്.പി ജോര്‍ജ് ചെറിയാന്‍, ഡിറ്റക്ടീവ് ഇന്‍സ്‌പെക്ടര്‍മാരായ എ. അഭിലാഷ്, സി.ആര്‍ പ്രമോദ്, കെ.പി ധനീഷ് എന്നിവര്‍ നാലു സംഘങ്ങളായാണ് റെയ്ഡ് നടത്തിയത്.