മഞ്ചേരി: ജനുവരി എട്ടിനഴ പയ്യനാട്ട് ആര്‍.എസ്.എസ് പ്രവര്‍ത്തകനെ വെട്ടിക്കൊലപ്പടുത്താന്‍ ശ്രമിച്ച കേസിലെ മുഖ്യപ്രതിയെ മഞ്ചേരി പൊലിസ് അറസ്റ്റ് ചെയ്തു. മഞ്ചേരി കിഴക്കേതല പൊടുവണ്ണിക്കല്‍ അബ്ദുല്‍ അസീസ് എന്ന മദീന കുഞ്ഞിമാ (42) നെയാണ് നിലമ്പൂര്‍ റെയില്‍വേ സ്റ്റേഷന്‍ പരിസരത്തുവച്ച് മലപ്പുറം ഡിവൈ.എസ്.പി ജലീല്‍ തോട്ടത്തിലിന്റെ നേതൃത്വത്തിലുള്ള പ്രത്യേക അന്വേഷണ സംഘം പിടികൂടിയത്.
ജനുവരി അഞ്ചിന് എസ്.ഡി.പി.ഐ പ്രവര്‍ത്തകനെ മഞ്ചേരി ചെങ്ങണയില്‍വച്ച് ഒരു സംഘം വെട്ടിക്കൊലപ്പെടുത്താന്‍ ശ്രമിച്ചിരുന്നു. അക്രമിസംഘത്തില്‍ അര്‍ജുന്‍ ഉണ്ടായിരുന്നുവെന്നും ഇതിലുള്ള പ്രതികാരമാണ് അക്രമത്തിനു കാരണമെന്നുമാണ് സൂചന. പയ്യനാട് സംഭവത്തില്‍ ആര്‍.എസ്.എസ് പ്രവര്‍ത്തകന്‍ പരുക്കേറ്റ് ചികിത്സയിലാണ്. ഈ കേസില്‍ നേരത്തെ മൂന്നു പ്രതികളെ പൊലിസ് അറസ്റ്റ് ചെയ്തിരുന്നു.
പാപ്പിനിപ്പാറ ആലുംകുന്ന് വാലഞ്ചേരി അഷ്‌റഫ് (45), മുള്ളമ്പാറ കള്ളാടിത്തൊടി തറമണ്ണില്‍ മുഹമ്മദ് അസ്‌ലം (36), മുള്ളമ്പാറ നമ്പിക്കുന്നന്‍ ഷിഹാബ് (39) എന്നിവര്‍ റിമാന്‍ഡില്‍ കഴിയുകയാണ്. ശിഹാബിനും ഇന്നലെ അറസ്റ്റിലായ അബ്ദുല്‍ അസീസിനും കേസില്‍ നേരിട്ടു പങ്കുണ്ട്. ഒളിവില്‍ കഴിഞ്ഞുവരുന്ന പ്രതികളെ സംബന്ധിച്ച് പൊലിസിന് വ്യക്തമായ സൂചന ലഭിച്ചതായാണ് വിവരം. പലയിടങ്ങളും പൊലിസ് നിരീക്ഷണത്തിലാണ്.
ഡിവൈ.എസ്.പിക്കൊപ്പം മഞ്ചേരി സി.ഐ എന്‍.ബി ഷൈജു, എ.എസ്.ഐമാരായ ശ്രീരാമന്‍, സുരേഷ്‌കുമാര്‍, പൊലിസുകാരായ ഉണ്ണികൃഷ്ണന്‍ മാരാത്ത്, രാജേഷ്, പി. സഞ്ജീവ്, ദിനേഷ് ഇരുപ്പകണ്ടന്‍, മുഹമ്മദ് സലീം പൂവ്വത്തി എന്നിവരാണ് അന്വേഷണം നടത്തുന്നത്.