കൊല്ലം: സി.പി.ഐ പാര്‍ട്ടി കോണ്‍ഗ്രസ് കഴിഞ്ഞതോടെ ചിറകരിയപ്പെട്ട അവസ്ഥയിലാണ് ഇസ്മായില്‍ വിഭാഗം. ഗോഡ്ഫാദറില്ലാത്തതാണ് സ്ഥാനം ലഭിക്കാത്തതിന് കാരണമെന്നും തനിക്ക് ഗോഡ്ഫാദറിനെ ആവശ്യമില്ലെന്നും ദിവാകരന്‍ മാധ്യമപ്രവര്‍ത്തകരോട് പറഞ്ഞു. സ്ഥാനങ്ങള്‍ വന്നും പോയുമിരിക്കും. തനിക്ക് പാര്‍ട്ടിയില്‍ പ്രത്യേക അവകാശവാദങ്ങളില്ല. പ്രായംകൊണ്ടല്ല തന്നെ ഒഴിവാക്കിയത്. പ്രായത്തെ ബഹുമാനിക്കുന്ന പാര്‍ട്ടിയാണ് സി.പി.ഐ. കേരള നേതൃത്വം തനിക്കുവേണ്ടി സംസാരിച്ചോയെന്ന് അറിയില്ലെന്നും ദിവാകരന്‍ പറഞ്ഞു.
ദിവാകരനെ ദേശീയ കൗണ്‍സിലില്‍നിന്ന് ഒഴിവാക്കിയത് പാര്‍ട്ടിയെ പിടിമുറുക്കാനുള്ള കാനത്തിന്റെ കരുനീക്കത്തിന്റെ ഭാഗമാണ്. നിലവില്‍ പാര്‍ട്ടിയില്‍ ഒറ്റപ്പെട്ട അവസ്ഥയിലാണ് ദിവാകരന്‍. കേരളത്തിലെ പ്രതിനിധികളുടെ യോഗത്തില്‍ ദിവാകരനെ ഒഴിവാക്കാനുള്ള തീരുമാനം വന്നപ്പോള്‍ ആരും എതിര്‍ത്തുമില്ല. മലപ്പുറം സമ്മേളനത്തില്‍ കാനത്തിനെതിരേ മത്സരിക്കാന്‍ ആദ്യം തീരുമാനിച്ച ദിവാകരന്റെ പിന്‍മാറ്റം ഇസ്മായില്‍ വിഭാഗത്തിന് തിരിച്ചടിയായിരുന്നു. എന്നാല്‍ കൊല്ലത്ത് ദിവാകരനെ സംരക്ഷിക്കാന്‍ ഇസ്മായിലിനും കഴിയാതെവന്നതോടെ ഒഴിവാക്കേണ്ട പ്രതിനിധികളുടെ കൂട്ടത്തില്‍ ദിവാകരനും കടന്നുകൂടുകയായിരുന്നു.