കൊണ്ടോട്ടി: പാലക്കാട്-കോഴിക്കോട് ദേശീയപാതയില്‍ നെടിയിരുപ്പ് മുസ്‌ലിയാരങ്ങാടിയില്‍ കാറുമായി കൂട്ടിയിടിച്ച ടിപ്പോര്‍ ലോറി കത്തിനശിച്ചു. അപകടത്തില്‍ കാര്‍ യാത്രക്കാരായ അഞ്ചു പേര്‍ക്കു പരുക്കേറ്റു. ഇന്നലെ പുലര്‍ച്ചെ അഞ്ചരയോടെ മുസ്‌ലിയാരങ്ങാടിക്കു സമീപം ഇരുപതാം മൈലിലാണ് സംഭവം. മലപ്പുറം ഭാഗത്തേക്കു പോകുകയായിരുന്ന ടിപ്പര്‍ ലോറിയില്‍ എതിരേ വന്ന കാര്‍ ഇടിക്കുകയായിരുന്നു. കാര്‍ ലോറിയുടെ ഡീസല്‍ ടാങ്കിലാണ് ഇടിച്ചത്. ഇടിയുടെ ആഘോതത്തില്‍ റോഡിലേക്കു മറിഞ്ഞ ലോറി നിമിഷനേരംകൊണ്ട് കത്തിയിമര്‍ന്നു. ലോറിയുടെ ഡീസല്‍ ടാങ്ക് തകര്‍ന്നു ഡീസല്‍ പുറത്തേക്കൊഴുകിയതോടെ തീ പടര്‍ന്നുപിടിക്കുകയായിരുന്നു. തീ ഉയരുന്നതുകണ്ടു ലോറി ഡ്രൈവര്‍ ഓടി രക്ഷപ്പെടുകയായിരുന്നു. ലോറി മറിഞ്ഞു സമീപത്തെ പഴകിയ വീടിന്റെ ഭാഗങ്ങള്‍ക്കും കേടുപാടുണ്ടായി. കാറും ലോറിയും പൂര്‍ണമായും തകര്‍ന്നു.
മലപ്പുറത്തുനിന്നെത്തിയ അഗ്‌നിശമനസേനയും നാട്ടുകാരും ചേര്‍ന്നാണ് തീയണച്ചത്. കോഴിക്കോട് കുണ്ടുപറമ്പ് സ്വദേശികളാണ് കാര്‍ യാത്രക്കാര്‍. ഇവര്‍ കൊടൈക്കനാലില്‍നിന്നു വിനോദയാത്ര കഴിഞ്ഞു മടങ്ങുകയായിരുന്നു. സാരമായ പരുക്കേറ്റ രാഹുല്‍, വൈശാഖ്, സാഹില്‍ എന്നിവരെ കോഴിക്കോട് മെഡിക്കല്‍ കോളജിലേക്കു മാറ്റി. അപകടത്തില്‍ തകര്‍ന്ന കാര്‍ കൊണ്ടോട്ടി പൊലിസ് സ്റ്റേഷനിലേക്കു മാറ്റി. കൊണ്ടോട്ടി പൊലിസ് കേസെടുത്തു. കഴിഞ്ഞ ദിവസം പൂക്കോട്ടൂരില്‍ കാര്‍ അപകടത്തില്‍പെട്ട് മൂന്നു യുവാക്കള്‍ മരിച്ചിരുന്നു.