ബാലുശ്ശേരി: സംസ്ഥാനത്തിന് അനുവദിച്ച ആള്‍ ഇന്ത്യാ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സ്(എയിംസ്) കിനാലൂരില്‍ സ്ഥാപിക്കാനുള്ള ശ്രമങ്ങള്‍ ഔദ്യോഗികതലത്തില്‍ നടക്കുന്നു. കിനാലൂര്‍ വ്യാവസായിക കേന്ദ്രത്തില്‍ കെ.എസ്.ഐ.ഡി.സിയുടെ കൈവശമുള്ള 200 ഏക്കര്‍ ഭൂമിയാണ് ഇതിനായി കണ്ടെത്തിയിരിക്കുന്നത്. സ്ഥലത്തിന്റെ പരിശോധനയ്ക്കായി കേന്ദ്ര സംഘം അടുത്തമാസം കിനാലൂര്‍ സന്ദര്‍ശിക്കും.
200 ഏക്കര്‍ ഭൂമി കൈമാറിയാല്‍ കേരളത്തിന് എയിംസ് അനുവദിക്കാമെന്നു രണ്ടു വര്‍ഷം മുന്‍പു കേന്ദ്രം സംസ്ഥാനത്തിന് ഉറപ്പുനല്‍കിയിരുന്നു. ഇതിന്റെ അടിസ്ഥാനത്തിലാണ് തിരുവനന്തപുരം, കോട്ടയം, എറണാകുളം ജില്ലകള്‍ക്കൊപ്പം കോഴിക്കോട് കിനാലൂരും ഇടംപിടിച്ചത്. എന്നാല്‍, അവസാന നിമിഷം നീക്കത്തില്‍ നിന്നു കേന്ദ്രം പിന്മാറുകയായിരുന്നു. യു.ഡി.എഫ് സര്‍ക്കാരിന്റെ അലംഭാവമാണ് എയിംസ് സംസ്ഥാനത്തിനു നഷ്ടമാകാന്‍ ഇടയാക്കിയതെന്ന് അന്നു വ്യാപക ആക്ഷേപമുയരുകയുണ്ടായി.
സംസ്ഥാനത്ത് എയിംസ് സ്ഥാപിക്കുന്നതില്‍ യു.ഡി.എഫ് അലംഭാവം കാണിക്കുന്നതായും ഇതുമൂലം ദേശീയപ്രധാനമായ ചികിത്സാലയമാണു കേരളത്തിനു നഷ്ടമാകുന്നതെന്നും 2014 ജൂലൈയില്‍ നിയമസഭയില്‍ അവതരിപ്പിച്ച അടിയന്തര പ്രമേയത്തില്‍ പ്രതിപക്ഷം ചൂണ്ടിക്കാട്ടി. സംസ്ഥാനത്തെ ഏതാനും സ്വകാര്യ മെഡിക്കല്‍ കോളജുകളാണ് ഇതിനു പിന്നിലെന്ന പ്രചാരണവുമുണ്ടായിരുന്നു.
അതിനിടെ, പുതിയ സര്‍ക്കാര്‍ അധികാരത്തിലേറിയ ശേഷം മുഖ്യമന്ത്രി പിണറായി വിജയന്‍ കേന്ദ്ര ആരോഗ്യമന്ത്രിയുമായി നടത്തിയ ചര്‍ച്ചയെ തുടര്‍ന്നാണ് എയിംസ് സംസ്ഥാനത്തു സ്ഥാപിക്കാനുള്ള നീക്കം വീണ്ടും ആരംഭിച്ചത്. കിനാലൂരില്‍ എയിംസ് സ്ഥാപിക്കുന്നതിന് അനുകൂല ഘടകങ്ങളാണു നിലവിലുള്ളതെന്നും അതിനു ശക്തമായ ശ്രമങ്ങള്‍ നടത്തുമെന്നും പുരുഷന്‍ കടലുണ്ടി എം.എല്‍.എ പറഞ്ഞു.