ഹരിപ്പാട്: യുവാവ് വീട്ടിലെ കിടപ്പുമുറിക്കുള്ളില്‍ ദുരൂഹ സാഹചര്യത്തില്‍ തൂങ്ങി മരിച്ച നിലയില്‍ കണ്ട സംഭവം ആത്മഹത്യയെന്ന് പൊലിസ്. മുതുകുളം വടക്ക് ഷിബുസദനത്തില്‍ പരേതനായ രവീന്ദ്രന്റെ മകന്‍ ഷാജികുമാറി (42)നെ യാണ് ചൊവ്വാഴ്ച വൈകിട്ട് തൂങ്ങി മരിച്ച നിലയില്‍ കണ്ടത്.
കൈകള്‍ രണ്ടും മൊബൈല്‍ ചാര്‍ജറിന്റെ വയര്‍ ഉപയോഗിച്ച് പിന്നില്‍ കെട്ടിയ നിലയിലായിരുന്നു മൃതദേഹം. ഇതാണ് സംശയത്തിന് കാരണമായത്. ബന്ധുക്കളുടെ പരാതിയെ തുടര്‍ന്ന് ജില്ലാ ക്രൈംബ്രാഞ്ച് സയന്റഫിക് ഓഫിസര്‍ ആര്‍.ആര്‍ രഞ്ജുവിന്റെ നേതൃത്വത്തില്‍ തെളിവുകള്‍ ശേഖരിച്ചു. വിരലടയാള വിദഗ്ധന്‍ ജി. അജിത്തും സ്ഥലത്തെത്തി തെളിവെടുത്തു. ഇവരുടെ പ്രാഥമിക പരിശോധനകളില്‍ സംശയകരമായൊന്നും കണ്ടെത്താനായില്ല.
പൊലിസ് സര്‍ജന്റെ സാനിധ്യത്തില്‍ നടത്തിയ പോസ്റ്റുമോര്‍ട്ടത്തിലും തൂങ്ങിമരിച്ചതായാണ് റിപ്പോര്‍ട്ട്. ആത്മഹത്യാ കുറിപ്പും പൊലിസ് പരിശോധിച്ചു. സംശയകരമായൊന്നും ഒന്നും തന്നെ ഇതിലില്ല.