എടക്കര: ഗൂഡല്ലൂര്‍ നാടുകാണിയില്‍ കാട്ടാനക്കൂട്ടം റോഡിലിറങ്ങി ഗതാഗതതടസം സൃഷ്ടിച്ചു. പന്ത്രണ്ടോളം കാട്ടാനകളാണ് റോഡിലിറങ്ങിയത്. രാവിലെ പത്തോടെ റോഡിലിറങ്ങിയ ആനക്കൂട്ടം രണ്ട് മണിക്കൂറോളം ഗതാഗതതടസം സൃഷ്ടിച്ചു.
നാടുകാണിയില്‍ ജീന്‍പൂള്‍ വനമേഖലയിലേക്ക് കടക്കാന്‍ ശ്രമിച്ചെങ്കും നടന്നില്ല. ശേഷം റോഡില്‍ നിലയുറപ്പിക്കുകയായിരുന്നു.
കിടങ്ങുകള്‍ നിര്‍മിച്ചത് മൂലം ആനത്താരകള്‍ മൂടിക്കിടന്നതാണ് ആനകള്‍ റോഡിലിറങ്ങാന്‍ കാരണമായി പറയുന്നത്. പ്രദേശത്ത് മുമ്പും കാട്ടാന ശല്യം രൂക്ഷമായിരുന്നു. അന്തര്‍ സംസ്ഥാന പാതയായതിനാല്‍ നിരവധി യാത്രക്കാരും ചരക്ക് ലോറികളും കടന്ന് പോകുന്ന പാതയാണിത്. കാട്ടാന ശല്യം രൂക്ഷമായ പ്രദേശത്ത് പൊലിസും വനപാലകരും വേണ്ട രീതിയില്‍ ഇടപെടുന്നില്ലെന്ന പരാതി നിലനില്‍ക്കുന്നുണ്ട്.