കുണ്ടറ: വ്യവസായ രംഗത്ത് ഉള്‍പ്പെടെ കുണ്ടറയ്ക്ക് നഷ്ടമായ പ്രതാപം വീണ്ടെടുക്കാന്‍ കൂട്ടായ പരിശ്രമം ആവശ്യമാണെന്ന് ഫിഷറീസ് പരമ്പരാഗത വകുപ്പ് മന്ത്രി ജെ. മേഴ്‌സിക്കുട്ടിയമ്മ. കുണ്ടറ അലിന്‍ഡ് വര്‍ക്കേഴ്‌സ് യൂനിയന്‍ (സി.ഐ.ടി.യു) 40-ാം വാര്‍ഷിക സമ്മേളനം ഉദ്ഘാടനം ചെയ്യുകയായിരുന്നു മന്ത്രി.
ഏതു മുന്നണിയുടെ കാലത്തായാലും അലിന്‍ഡ് തുറന്നു പ്രവര്‍ത്തിപ്പിക്കുന്നതിനുള്ള നടപടികളോട് പൂര്‍ണ്ണമായും സഹകരിക്കുക എന്നതാണ് സി.ഐ.ടി.യു നിലപാട് എന്നാല്‍ പലരും ഇതിനെ തുരങ്കം വച്ചെങ്കിലും യൂനിയന്റെ നിശ്ചയദാര്‍ഢ്യമാണ് കമ്പനി തുറന്നു പ്രവര്‍ത്തിപ്പികുന്നതിന് ഏറെ സഹായകരമായത്.
കുണ്ടറയിലെ മറ്റ് വ്യവസായ സ്ഥാപനങ്ങളും പുരോഗതിയുടെ പാതയിലാണ്. കുണ്ടറ അലൈഡിന്റെ പ്രവര്‍ത്തനം മെച്ചപ്പെടുത്തുന്നതിനായി സര്‍ക്കാര്‍ അഞ്ചു കോടി നല്‍കി കഴിഞ്ഞു.
കേരളാ സിറാമിക്‌സും നേട്ടങ്ങള്‍ കൈവരിച്ച് തുടങ്ങി. സംസ്ഥാനത്ത് നഷ്ടത്തില്‍ പ്രവര്‍ത്തിച്ചിരുന്ന വ്യവസായ സ്ഥാപനങ്ങളില്‍ 30 ശതമാനത്തോളം ഇടതുഭരണകാലത്ത് ലാഭം കൈവരിച്ചതായും മന്ത്രി പറഞ്ഞു.
യൂനിയന്‍ വര്‍ക്കിങ് പ്രസിഡന്റ് എസ്.എല്‍ സജികുമാര്‍ അധ്യക്ഷനായി.
സി.ഐ.ടി.യു കുണ്ടറ ഏരിയാ കമ്മിറ്റി സെക്രട്ടറി സുരേഷ് ബാബു, വി. ശിവപ്രസാദ്, സുരേഷ് കുമാര്‍, തങ്കച്ചന്‍, അജയന്‍, പ്രശാന്ത്, സന്തോഷ് ബാബു, ശാന്തകുമാരന്‍, സാബുജോണ്‍ സംസാരിച്ചു.