എടപ്പാള്‍: വട്ടംകുളം ഗ്രാമപ്പഞ്ചായത്തിലെ റേഷന്‍ മുന്‍ഗണനപ്പട്ടികയിലെ അര്‍ഹരേയും അനര്‍ഹരേയും കണ്ടെണ്ടത്തുന്നതിനായുള്ള ഗ്രാമസഭകള്‍ ഞായറാഴ്ച മുതല്‍ ആരംഭിക്കും. ഗ്രാമസഭ വിളിച്ച് ചേര്‍ക്കാത്തതിനെതിരേ പ്രതിഷേധം ഉയര്‍ന്നിരുന്നു. പട്ടിക ലഭിച്ച് ദിവസങ്ങളോളം അത് പ്രസിദ്ധീകരിക്കാതെ ചൊവ്വാഴ്ച റേഷന്‍കടകളിലെത്തിക്കുകയും വ്യാഴാഴ്ചയ്ക്കകം പരിശോധിച്ച് പരാതിനല്‍കാന്‍ നിര്‍ദേശിക്കുകയും ചെയ്ത പഞ്ചായത്ത് നടപടി സര്‍ക്കാര്‍ നിര്‍ദേശത്തിന് വിരുദ്ധമാണെന്നാരോപിച്ചാണ് പ്രതിഷേധവുമായി ഒരു വിഭാഗം രംഗത്ത് വന്നത്.
സര്‍ക്കാര്‍ നിര്‍ദ്ദേശപ്രകാരം പഞ്ചായത്തുകളില്‍ പ്രത്യേക ഗ്രാമസഭകളില്‍ കരട് പട്ടിക അവതരിപ്പിച്ച് പരാതികള്‍ സ്വീകരിക്കുകയും ചേര്‍ക്കാനുള്ളവരെ ചേര്‍ക്കാന്‍ നടപടിയെടുക്കുകയും വേണം. എല്ലാ പഞ്ചായത്തുകളിലും ഇപ്രകാരം നടന്നെങ്കിലും വട്ടംകുളത്ത് ഗ്രാമസഭകള്‍ ചേര്‍ന്നിരുന്നില്ല ഇതാണ് പ്രതിഷേധത്തിലേക്ക് നയിച്ചത്. അനര്‍ഹരെ സഹായിക്കാനും അര്‍ഹര്‍ക്ക് ചേരാന്‍ അവസരം നിഷേധിക്കാനുമായാണ് ഇത്തരമൊരു സമീപനം സ്വീകരിച്ചതെന്നുമാണ് പ്രതിഷേധക്കാര്‍ ആരോപിച്ചത്. എന്നാല്‍ കരട് പട്ടിക കിട്ടാന്‍ കാലതാമസം വന്നതിനാല്‍ ജനങ്ങളെ അറിയിക്കുന്നതിന് വേണ്ടണ്ടിയാണ് പട്ടിക റേഷന്‍കടകളിലും പഞ്ചായത്തിലും പ്രസിദ്ധീകരിച്ചതെന്നും ഗ്രാമസഭകള്‍ ഞായറാഴ്ച മുതല്‍ ചേരാന്‍ നേരത്തെ നിശ്ചയിച്ചതാണെന്നും പത്തൊന്‍പതിന് ഗ്രാമസഭകള്‍ അവസാനിക്കുന്നതോടെ പുതിയ പട്ടിക സമര്‍പ്പിക്കുമെന്നും പഞ്ചായത്ത് അധികൃതര്‍ അറിയിച്ചു.