മാനന്തവാടി: മാതാവിന്റെ സ്വത്ത് തട്ടിയെടുത്ത് വീട്ടില്‍ നിന്നും ഇറക്കിവിട്ട കേസില്‍ പ്രതിമാസം ആയിരം രൂപ ജീവനാംശം കൊടുക്കാന്‍ വിധിച്ച കോടതി ഉത്തരവ് പാലിക്കാത്ത മകന് ഒരു മാസം ജയില്‍ശിക്ഷ.
മേപ്പാടി കോട്ടപ്പടി വട്ടപ്പാറ വീട്ടില്‍ കറുകന്റെ മകന്‍ രാജുവിനെയാണ് മാനന്തവാടി സബ് ഡിവിഷണല്‍ മജിസ്‌ട്രേറ്റ് കോടതി ശിക്ഷിച്ചത്. മരണപ്പെട്ട കറുകന്റെ ഭാര്യ മാധവി കൊടുത്ത പരാതിയിലാണ് 2018 ഏപ്രില്‍ മുതല്‍ പ്രതിമാസം 1000 രൂപാ വീതം ജീവനാംശം നല്‍കാനും മാതാവിനെ വീട്ടില്‍ താമസിപ്പിക്കാനും മാര്‍ച്ച് 18ന് കോടതി വിധിച്ചത്.
മുതിര്‍ന്ന പൗരന്‍മാരുടെയും മാതാപിതാക്കളുടെയും ക്ഷേമത്തിന് വേണ്ടിയുള്ള നിയമം 2007 പ്രകാരം സമര്‍പ്പിക്കപ്പെട്ട കേസിലാണ് മാനന്തവാടി സബ് ഡിവിഷന്‍ മജിസ്‌ട്രേറ്റ് എന്‍.എസ്.കെ ഉമേഷ് വിധി പ്രഖ്യാപിച്ചത്. എന്നാല്‍ പത്ത് മാസം പിന്നിട്ടിട്ടും ജീവനാംശം നല്‍കാത്തതിനെ തുടര്‍ന്നാണ് മകന്‍ രാജുവിനെ ഇന്നലെ കോടതി ഒരു മാസത്തെ തടവിന് ശിക്ഷിച്ചത്.
താനും ഭര്‍ത്താവും കൂടി സമ്പാദിച്ച വീടും സ്വത്തും മകന്‍ രാജു, മരുമകള്‍ ശോഭ, സഹോദരിയുടെ മക്കളായ പ്രസാദ്, രവി എന്നിവര്‍ ചേര്‍ന്ന് തട്ടിയെടുത്ത് വീട്ടില്‍ നിന്ന് പുറത്താക്കി എന്നായിരുന്നു മാധവി 2017ല്‍ നല്‍കിയ പരാതി.