മുംബൈ: കൊവിഡ്-19 പ്രതിരോധ പ്രവര്‍ത്തനത്തിന്റെ ഭാഗമായി രാജ്യത്ത് ലോക്ക് ഡൗണ്‍ പ്രഖ്യാപിച്ച സാഹചര്യത്തില്‍ റിസര്‍വ് ബാങ്ക് ഉള്‍പ്പെടെയുള്ള ബാങ്കുകളുടെ പ്രവര്‍ത്തനം നിര്‍ത്താന്‍ ഒരുങ്ങുന്നതായി റിപ്പോര്‍ട്ടുകള്‍. രാജ്യം മുഴുവന്‍ ജാഗ്രത പാലിക്കുമ്പോള്‍ ബാങ്ക് ജീവനക്കാരെ സുരക്ഷ കൂടി
പരിഗണിക്കുന്നതിന്റെ ഭാഗമായാണ് ബാങ്ക് പ്രവര്‍ത്തനം നിര്‍ത്തുന്നത് സംബന്ധിച്ച്‌ ആലോചിക്കുന്നത്.

പ്രധാന നഗരങ്ങളില്‍ അഞ്ചുകിലോമീറ്ററില്‍ ഒരു ശാഖ മാത്രം തുറന്നാല്‍ മതിയെന്നാണ് തീരുമാനമെന്നാണ് സൂചന.അതേ സമയം ഗ്രാമപ്രദേശങ്ങളില്‍ ഭൂരിഭാഗം ആളുകളും ബാങ്ക് ശാഖകളെയാണ് എല്ലാ പണമിടപാടുകള്‍ക്കും ആശ്രയിക്കുന്നത്. ഇവിടങ്ങളില്‍ ഒന്നിടവിട്ട ദിവസങ്ങളില്‍ പ്രവര്‍ത്തിപ്പിക്കുന്ന കാര്യവും ആലോചിക്കുന്നുണ്ട്

എന്നാല്‍ ബാങ്ക് ശാഖകള്‍ അടച്ചിട്ടാല്‍ കേന്ദ്ര ധനമന്ത്രി പ്രഖ്യാപിച്ച സാമ്പത്തിക പാക്കേജുകള്‍ എങ്ങനെ ജനങ്ങളിലേക്കെത്തിക്കും എന്ന കാര്യത്തില്‍ ആശങ്ക ഉയരുന്നുണ്ട്. ധനമന്ത്രി പ്രഖ്യാപിച്ച ക്ഷേമപെന്‍ഷനുകള്‍ ഉള്‍പ്പടെയുള്ള ആനുകൂല്യങ്ങള്‍ ബാങ്ക് വഴിയാണ് വിതരണം ചെയ്യുന്നത്.രാജ്യത്ത് പ്രഖ്യാപിച്ച് 21 ദിവസത്തെ ലോക്ക്ഡൗണില്‍നിന്നും ബാങ്കുകളെ ഒഴിവാക്കിയിരുന്നു.