മുക്കം: ലോക്‌സഭാ തെരഞ്ഞെടുപ്പില്‍ വയനാട് മണ്ഡലത്തില്‍ പാര്‍ട്ടി പറഞ്ഞാല്‍ മത്സരിക്കാന്‍ ഒരുക്കമാണെന്ന് എ.ഐ.സി.സി അംഗം ഷാനിമോള്‍ ഉസ്മാന്‍.
മുല്ലപ്പള്ളി രാമചന്ദ്രന്‍ നയിക്കുന്ന ജനമഹായാത്രക്കിടെ മാധ്യമങ്ങളോട് സംസാരിക്കുകയായിരുന്നു അവര്‍. കോണ്‍ഗ്രസില്‍ സ്ഥാനാര്‍ഥി നിര്‍ണയത്തില്‍ ഒരുപാട് കടമ്പകള്‍ ഉണ്ട്. താഴെ തട്ടില്‍ നിന്ന് പേരുകള്‍ ഉയര്‍ന്ന് വരികയും അത് സംസ്ഥാന തെരഞ്ഞെടുപ്പ് കമ്മിറ്റിയും സ്‌ക്രീനിങ് കമ്മിറ്റിയും തുടര്‍ന്ന് കേന്ദ്ര തെരഞ്ഞെടുപ്പ് കമ്മിറ്റിയും പരിശോധിച്ചാണ് അന്തിമ തീരുമാനമെടുക്കുന്നത്.
മുസ്‌ലിം ലീഗിന്റെ എതിര്‍പ്പാണോ സ്ഥാനാര്‍ഥിയാവുന്നതിന് പ്രധാന തടസമെന്ന ചോദ്യത്തിന് ഉത്തരവാദിത്വപ്പെട്ട പാര്‍ട്ടി പ്രവര്‍ത്തക എന്ന നിലക്ക് തനിക്ക് മറുപടി പറയാനാവില്ലെന്നും ജനമഹാ യാത്ര കഴിഞ്ഞാല്‍ എല്ലാം അറിയാമെന്നും ഷാനിമോള്‍ ഉസ്മാന്‍ പറഞ്ഞു.കേരളത്തില്‍ യോഗ്യരായ നിരവധി സ്ഥാനാര്‍ഥികള്‍ ഉണ്ട്. അത് തന്നെയാണ് കോണ്‍ഗ്രസിന്റെ ശക്തിയും.
അഞ്ച് വര്‍ഷത്തെ മോദിയുടെ ഭരണവും രണ്ടര വര്‍ഷത്തെ പിണറായി വിജയന്റ ഭരണവും 20 സീറ്റില്‍ യു.ഡി.എഫിന് വിജയിക്കാനുള്ള സാധ്യത സംസ്ഥാനത്ത് ഉണ്ടാക്കിയെന്നും അവര്‍ വ്യക്തമാക്കി.