ജിദ്ദ: കൊവിഡ് 19 നെ ചെറുക്കുന്നതിനും സമ്പദ്‌വ്യവസ്ഥയിലുള്ള വിശ്വാസം പുനഃസ്ഥാപിക്കുന്നതിനും പരസ്പര സഹകണത്തോടെയും ഏകോപനത്തോടെയുമുള്ള ശക്തമായ നടപടികൾ ആവശ്യമാണെന്ന് തിരുഗേഹങ്ങളുടെ സേവകൻ സൽമാൻ രാജാവ് പറഞ്ഞു. ജി-20 ഉച്ചകോടിയിൽ അധ്യക്ഷം വഹിച്ചാണ് കൊറോണ വ്യാപനം ചെറുക്കുന്നതിനും സമ്പദ്‌വ്യവസ്ഥയിലുള്ള വിശ്വാസം പുനഃസ്ഥാപിക്കുന്നതിനും ശക്തമായ നടപടികൾ സ്വീകരിക്കേണ്ടതിന്റെ പ്രാധാന്യം സൽമാൻ രാജാവ് ഊന്നിപ്പറഞ്ഞത്. കൊറോണ വ്യാപനത്തിന്റെ പ്രത്യഘാതങ്ങൾ ലഘൂകരിക്കുന്നതിനെ കുറിച്ചും കൊറോണ വ്യാപനം ചെറുക്കുന്നതിന് ആഗോള തലത്തിൽ ഏകോപനത്തോടെ ശ്രമങ്ങൾ ഊർജിതമാക്കുന്നതിനെ കുറിച്ചും വിശകലനം ചെയ്യുന്നതിന് സൽമാൻ രാജാവിന്റെ അധ്യക്ഷതയിൽ വീഡിയോ കോൺഫറൻസ് രീതിയിലാണ് അസാധാരണ ജി-20 ഉച്ചകോടി നടന്നത്. നിലവിൽ ജി-20 അധ്യക്ഷസ്ഥാനം വഹിക്കുന്ന സഊദി അറേബ്യ മുൻകൈയെടുത്താണ് ഉച്ചകോടി വിളിച്ചുചേർത്തത്. 

കൊറോണ മഹാമാരി ചെറുക്കുന്നതിന് വ്യത്യസ്ത തലങ്ങളിൽ ശക്തമായ മുൻകരുതൽ നടപടികൾ ആവശ്യമാണെന്ന് സൽമാൻ രാജാവ് പറഞ്ഞു. 

ലോകത്തെ നിരവധി രാജ്യങ്ങളിൽ ഈ മഹാമാരി ഇപ്പോഴും ജീവൻ കവരുകയും ദുരിതം വിതക്കുകയും ചെയ്യുന്നു. കൊറോണ വൈറസിന്റെ പ്രത്യാഘാതങ്ങൾ കൂടുതൽ വ്യാപിച്ച് സമ്പദ്‌വ്യവസ്ഥകളെയും ഓഹരി വിപണികളെയും ആഗോള വ്യാപാരത്തെയും വിതരണ ചെയിനുകളെയും ബാധിക്കാനിടയുണ്ട്. ഇത് വികസനത്തിനും വളർച്ചക്കും പ്രതിബന്ധം സൃഷ്ടിക്കുകയും മുൻ വർഷങ്ങളിൽ ലോകം നേടിയ ആർജിത നേട്ടങ്ങളെ പ്രതികൂലമായി ബാധിക്കുകയും ചെയ്യും. ഈ മാനുഷിക പ്രതിസന്ധിക്ക് ആഗോള പ്രതികരണം ആവശ്യമാണ്. ഈ മഹാമാരി ചെറുക്കുന്നതിന് ജി-20 രാജ്യങ്ങൾ ഒരുമിച്ചുനിൽക്കുകയും ഒറ്റക്കെട്ടായി പ്രവർത്തിക്കുകയും വേണമെന്നും സൽമാൻ രാജാവ് രാഷ്ട്രങ്ങളോട് ആവശ്യപ്പെട്ടു. 

യോഗത്തിൽ പ്രധാനമന്ത്രി നരേന്ദ്ര മോദിയും സംസാരിച്ചു. അംഗ രാജ്യങ്ങളായ ജോര്‍ദാന്‍, സ്‌പെയിന്‍, സിംഗപൂര്‍, സ്വിറ്റ്സര്‍ലാന്റ്, യു.എ.ഇ തുടങ്ങിയ രാജ്യങ്ങളുടെ തലവന്മാരും ജി.സി.സി പ്രസിഡന്റും യോഗത്തില്‍ പങ്കെടുത്തു. ഇവര്‍ക്ക് പുറമെ ഐക്യരാഷ്ട്ര, ലോകാരോഗ്യ സംഘനാ പ്രതിനിധികളും സംബന്ധിച്ചു.