ന്യൂഡല്‍ഹി: സാമ്പത്തികമായി പിന്നാക്കം നില്‍ക്കുന്ന മേല്‍ജാതിക്കാര്‍ക്ക് 10 ശതമാനം സംവരണം ഏര്‍പ്പെടുത്തിയ കേന്ദ്രസര്‍ക്കാര്‍ തീരുമാനത്തിനെതിരായ ഹരജിയില്‍ വേഗത്തില്‍ വാദം കേള്‍ക്കാന്‍ സുപ്രിംകോടതി തീരുമാനം.

കോണ്‍ഗ്രസ് നേതാവ് തഹ്‌സീന്‍ പൂനാവാല നല്‍കിയ ഹരജിയില്‍ ബന്ധപ്പെട്ട കക്ഷികള്‍ക്ക് നോട്ടിസയക്കാനും ചീഫ് ജസ്റ്റിസ് അധ്യക്ഷനായ ബെഞ്ച് ഉത്തരവിട്ടു. എന്നാല്‍ ഭേദഗതി സ്റ്റേ ചെയ്യണമെന്ന ആവശ്യം സുപ്രിംകോടതി അംഗീകരിച്ചില്ല. ഇതു സംബന്ധിച്ച് ഭരണഘടനയില്‍ നടത്തിയ 103ാം ഭേദഗതിയെയാണ് ഹരജിയില്‍ ചോദ്യം ചെയ്തിരിക്കുന്നത്. യൂത്ത് ഫോര്‍ ഇക്വാലിറ്റി എന്ന സംഘടന സമര്‍പ്പിച്ച ഹരജിയും ഇതോടൊപ്പം പരിഗണിക്കും.
ആകെ സംവരണത്തിന് 50 ശതമാനം പരിധി നിശ്ചയിച്ച 1993ലെ സുപ്രിംകോടതി ഉത്തരവ് ലംഘിക്കുന്നതും ഭരണഘടനയുടെ അടിസ്ഥാന തത്വങ്ങള്‍ക്ക് വിരുദ്ധവുമാണ് 10 ശതമാനം സംവരണമെന്നാണ് ഹരജിയിലെ പ്രധാന വാദം. 27 ശതമാനം സംവരണം ഒ.ബി.സി വിഭാഗങ്ങള്‍ക്കും 22 ശതമാനം പട്ടികജാതി, പട്ടികവര്‍ഗവിഭാഗങ്ങള്‍ക്കും ഏര്‍പ്പെടുത്തിയത് അവരുടെ സാമൂഹിക പിന്നാക്കാവസ്ഥ പരിഗണിച്ചാണ്. ഇതോടൊപ്പം 10 ശതമാനം സാമ്പത്തിക സംവരണം ഏര്‍പ്പെടുത്തിയാല്‍ ആകെ സംവരണം 60 ശതമാനമായി ഉയരും.

സാമൂഹിക വിദ്യാഭ്യാസ പിന്നാക്കാവസ്ഥയുടെ മാത്രം അടിസ്ഥാനത്തിലാണ് സംവരണം ഏര്‍പ്പെടുത്തേണ്ടതെന്നും സാമ്പത്തിക പിന്നാക്കാവസ്ഥ പരിഗണിക്കരുതെന്നും ഒന്‍പതംഗ ഭരണഘടനാ ബെഞ്ച് ഉത്തരവിട്ടതായും ഹരജി ചൂണ്ടിക്കാട്ടുന്നു.