കാഞ്ഞങ്ങാട്: നഗരസഭാ യോഗത്തിന്റെ മിനുട്‌സ് തിരുത്തിയതുമായി ബന്ധപ്പെട്ടുള്ള അന്വേഷണം പൂര്‍ത്തിയായി. ഇതു സംബന്ധമായി വിജിലന്‍സ് ഡയറക്ടറുടെ അനുമതി കിട്ടിയ ഉടന്‍ കുറ്റപത്രം സമര്‍പ്പിക്കുമെന്നു വിജിലന്‍സ് ഡിവൈ.എസ്.പി രഘുറാം പറഞ്ഞു. നഗരസഭാ ഉടമസ്ഥതയില്‍ അലാമിപ്പള്ളിയില്‍ ബസ് സ്റ്റാന്‍ഡ് കം ഷോപ്പിങ് കോംപ്ലക്‌സും ആധുനിക രീതിയിലുള്ള സ്റ്റേഡിയവും സ്ഥാപിക്കുന്നതിനു വേണ്ടി ഏറ്റെടുക്കാന്‍ തീരുമാനിച്ച സ്ഥലത്തിന്റെ സര്‍വേ നമ്പറുകള്‍ യോഗത്തിനു ശേഷം ഭരണസമിതി അറിയാതെ തിരുത്തുകയായിരുന്നു. ഭൂമി ഏറ്റെടുക്കുന്നതുമായി ബന്ധപ്പെട്ട് 2009 ജൂണ്‍ 16നു ചേര്‍ന്ന യോഗത്തിന്റെ മിനുട്‌സാണു ഉദ്യോഗസ്ഥര്‍ പിന്നീട് തിരുത്തിയതെന്നായിരുന്നു ആരോപണം.
സംഭവം വിവാദമായതിനെ തുടര്‍ന്നു വിജിലന്‍സ് പരിശോധന നടത്തുകയും മിനുട്‌സ് തിരുത്തിയ കൈയക്ഷരം ആരുടെതെന്നു കണ്ടെത്തുന്നതിന് ഇത് ഫോറന്‍സിക് പരിശോധനക്ക് അയക്കുകയുമായിരുന്നു. ഇതിന്റെ റിപ്പോര്‍ട്ട് കഴിഞ്ഞ ആഴ്ച വിജിലന്‍സിനു ലഭിച്ചിരുന്നു. നഗരസഭയില്‍ അന്നുണ്ടായിരുന്ന ക്ലര്‍ക്കിന്റേതാണു തിരുത്തിയ കൈയക്ഷരമെന്ന് പരിശോധനയില്‍ വിജിലന്‍സ് ഉറപ്പിച്ചിട്ടുണ്ട്.
അതേ സമയം, ഇക്കാലയളവില്‍ നഗരസഭയില്‍ എന്‍ജിനിയറായിരുന്ന എം.ടി. ഗണേശനാണ് ഈ കേസിലെ ഒന്നാം പ്രതി. ഇയാള്‍ ഇപ്പോള്‍ സസ്‌പെന്‍ഷനില്‍ കഴിയുകയാണ്. ഇതിന് പുറമേ സെക്രട്ടറിയുടെ ചാര്‍ജ് ഉണ്ടായിരുന്ന ജോണ്‍ ഉള്‍പ്പെടെ എട്ടോളം ആളുകള്‍ ഈ കേസില്‍ പ്രതികളായുണ്ട്.
നഗരസഭാ ഭരണ സമിതി ഏറ്റെടുക്കാന്‍ തീരുമാനിച്ച സ്ഥലങ്ങളുടെ സര്‍വേ നമ്പറുകള്‍ സ്വകാര്യ വ്യക്തികളെ സഹായിക്കാന്‍ എം.ടി. ഗണേശന്‍ ഉള്‍പ്പെടെയുള്ള ഉദ്യോഗസ്ഥര്‍ ക്ലാര്‍ക്കായ ശശിയെ കൊണ്ടു തിരുത്തി എഴുതിച്ചതായാണു വിജിലന്‍സിന്റെ നിഗമനം.
കേസുമായി ബന്ധപ്പെട്ടുള്ള അന്വേഷണങ്ങള്‍ പൂര്‍ത്തിയായതോടെ ഈ വിവരങ്ങള്‍ വിജിലന്‍സ് ഡയറക്ടര്‍ക്കു കൈമാറാനുള്ള ഒരുക്കങ്ങള്‍ പൂര്‍ത്തീകരിച്ചു വരുന്നതായി ഡിവൈ.എസ്.പി പറഞ്ഞു. അനുമതി കിട്ടുന്നതോടെ കുറ്റപത്രം കോടതിയില്‍ സമര്‍പ്പിക്കും.