ശ്രീകാര്യം: കുഴിവിള തമ്പുരാന്‍ മുക്കില്‍ തെരഞ്ഞെടുപ്പിന് മുന്നോടിയായുള്ള ചുമരെഴുത്തുമായി ബന്ധപ്പെട്ട് നടന്ന തര്‍ക്കത്തില്‍ സി.ഐ.ടി.യു പ്രവര്‍ത്തകര്‍ക്ക് കുത്തേറ്റു. കരിമണല്‍ സി.ഐ.ടി.യു കണ്‍വീനര്‍ കരിമണല്‍ പുല്ലുകാട് വെട്ടുനിലത്തില്‍ വീട്ടില്‍ സൂരജ് (36), സി.ഐ.ടി.യു പ്രവര്‍ത്തകനായ പുല്ലുകാട് സ്വദേശി രാജീവ് (37) എന്നിവര്‍ക്കാണ് കുത്തേറ്റത്.
വയറില്‍ ആഴത്തില്‍ മുറിവേറ്റ രാജീവിനെ മെഡിക്കല്‍ കോളജിലും തുടര്‍ന്ന് സ്വകാര്യ ആശുപത്രിയിലും പ്രവേശിപ്പിച്ചു. സംഭവവുമായി ബന്ധപ്പെട്ടു ബി.ജെ.പി പ്രവര്‍ത്തകനായ കാവോട്ടുമുക്ക് കൃഷണ ഭവനില്‍ മനോജി (23) നെ തുമ്പ പൊലിസ് അറസ്റ്റ് ചെയ്തു. വ്യാഴാഴ്ച രാത്രി 11.55 ഓടെയാണ് സംഭവം. സി.പി.എമ്മിന്റെ സ്വാധീന മേഖലയായ കരിമണലില്‍ തെരഞ്ഞെടുപ്പുമായി ബന്ധപ്പെട്ടു ചുമരുകളില്‍ ചുമരെഴുത്തിനായി സി.പി.എമ്മാണ് ബുക്ക് ചെയ്തിരുന്നത്. സി.പി.എമ്മില്‍നിന്നു ബി.ജെ.പിയിലേക്ക് പോയ പ്രതികളില്‍ ഒരാള്‍ ചുമരുകളില്‍ ബി.ജെ.പി ബുക്ക് ചെയ്‌തെന്നു എഴുതുകയും തുടര്‍ന്ന് അത് മായ്ക്കാനായി എത്തിയ രാജീവിന്റെയും സൂരജിനെയും അവിടെയുണ്ടായിരുന്ന നാലുപേര്‍ ചേര്‍ന്ന് മര്‍ദിച്ചു കൈയിലുണ്ടായിരുന്ന ആയുധം ഉപയോഗിച്ച് കുത്തുകയായിരുന്നു.