പാരീസ്: ഫ്രാന്‍സ് പ്രസിഡന്റ് ഇമ്മുനുവല്‍ മാക്രോണിന്റെ തൊഴില്‍ പരിഷ്‌കരണങ്ങള്‍ക്കെതിരേ മെയ് ദിനത്തില്‍ റാലി നടത്തിയതിനെത്തുടര്‍ന്ന് 109 പേര്‍ പൊലിസ് കസ്റ്റഡിയില്‍.
പാരീസില്‍ നടന്ന പ്രതിഷേധ റാലിയില്‍ സംഘര്‍ഷത്തില്‍ പങ്കെടുത്തുവെന്ന് കരുതപ്പെടുന്നവരെയാണ് കസ്റ്റഡിയിലെടുത്തത്. നേരത്തെ 200 പേരെ കസ്റ്റഡിയെലെടുത്തുവെന്നാണ് ആഭ്യന്തര മന്ത്രാലയം അറിയിച്ചതെങ്കിലും പിന്നീട് തിരുത്തുകയായിരുന്നു.
റാലിയില്‍ മുഖം മൂടി ധാരികളായ പ്രതിഷേധക്കാര്‍ കടകളും വാഹനങ്ങളും അടച്ചു തകര്‍ത്തിരുന്നു. തുടര്‍ന്ന് പൊലിസുമായി പ്രതിഷേധക്കാര്‍ ഏറ്റുമുട്ടി. സംഭവത്തില്‍ നാല് പേര്‍ക്ക് ഗുരുതര പരുക്കേറ്റു. സമാധാനമായി നടത്തിയിരുന്ന റാലിയില്‍ വലതു പക്ഷ വിഭാഗമായ ബ്ലാക്ക് ബോസ് അതിക്രമിച്ച് കയറുകയായിരുന്നു. പ്രതിഷേധക്കാരെ തുരത്താനായി പൊലിസ് ടിയര്‍ ഗ്യാസും, ജല പീരങ്കിയുമുപയോഗിച്ചു. മുഖം മൂടി ധരിച്ച 1,200 പ്രതിഷധക്കാര്‍ മെയ് ദിന റാലിയില്‍ പങ്കെടുത്തിരുന്നുവെന്ന് പൊലിസ് പറഞ്ഞു.
ഫ്രാന്‍സിലെ തൊഴില്‍ പരിഷ്‌കാരത്തിനെതിരേ വ്യാപകപ്രതിഷേധമാണുള്ളത്. റെയില്‍വേ ഉദ്യോഗസ്ഥര്‍ രാജ്യവ്യാപമായി മൂന്ന് മാസത്തെ സമരത്തിലാണ്. റെയില്‍വേ തൊഴിലാളികള്‍ ഉള്‍പ്പെടെയുള്ളവര്‍ പാരീസില്‍ നടന്ന മെയ്ദിന റാലിയില്‍ പങ്കെടുത്തു.
ആയിരിക്കണക്കിന് അധ്യാപകര്‍, നഴ്‌സുമാര്‍, മറ്റു തൊഴിലാളില്‍ എന്നിവര്‍ റാലിക്ക് പിന്തുണ അര്‍പ്പിച്ചു. 55,000 പേര്‍ റാലിയില്‍ പങ്കെടുത്തുവെന്ന് തൊഴിലാളി യൂനിയന്‍ അവകാശപ്പെട്ടു.