തൊണ്ണൂറാം മിനുട്ടില്‍ വഴങ്ങുന്ന ഗോള്‍ ആത്മഹത്യയ്ക്കു സമമാണ്. അത്ര നേരം പ്രതിരോധിച്ച് ഒടുവില്‍ ഒരൊറ്റ നിമിഷത്തിന്റെ അശ്രദ്ധയില്‍ വഴങ്ങുന്ന ഗോള്‍ തിരിച്ചു വരാനാവാത്ത വിധമുള്ള കയത്തിലേക്ക് ടീമുകളെ തള്ളിയിടുന്നു.

90മിനുട്ടും വിജയിക്കുമെന്നോ സമനിലയിലാകുമെന്നോ പ്രതീക്ഷിച്ച് കളിക്കുന്നവര്‍ക്കിടയിലേക്ക് ഇടിത്തീ പോലെയാണ് അവസാന മിനുട്ടുകളിലെ ഗോള്‍ പിറക്കുന്നത്. തിരിച്ചടിക്കാനുള്ള ശക്തി ആര്‍ജിക്കുന്നതിന്റെ മുന്‍പെ മത്സരം തീര്‍ന്നിരിക്കും. 2014 ലോകകപ്പില്‍ ഹോളണ്ട് മെക്‌സിക്കോ മത്സരത്തിന്റെ 92ാം മിനുട്ടില്‍ ആര്യന്‍ റോബന്‍ നേടിയ ഗോളിലാണ് ഹോളണ്ട് ക്വാര്‍ട്ടറിലേക്ക് യോഗ്യത നേടിയത്. അതേ ലോകകപ്പില്‍ തന്നെ സ്വിറ്റ്‌സര്‍ലന്‍ഡ് ഇക്വഡോര്‍ മത്സരത്തില്‍ കളിയവസാനിക്കാല്‍ 20 സെക്കന്‍ഡ് മാത്രം ബാക്കി നില്‍ക്കെ സ്വിറ്റ്‌സര്‍ലന്‍ഡ് ഗോള്‍ നേടി മത്സരം കൈക്കലാക്കുന്നു.

2016ലെ യൂറോ കപ്പ് ഇത്തരത്തിലുള്ള ചില മിന്നല്‍ കണക്കുകള്‍ കൊണ്ട് ശ്രദ്ധേയമാകുകയാണ്. ഇതുവരെ കഴിഞ്ഞ 28 മത്സരങ്ങള്‍ ആധികാരികമായി ഒരു ടീമും ജയിച്ചതായി പറയാന്‍ സാധിക്കില്ല. കഴിയുന്നതു വരെ ശ്വാസമടക്കിപ്പിടിച്ചിരുന്ന് മാത്രം കാണാന്‍ കഴിയുന്ന കളികളായിരുന്നു എല്ലാം. തുര്‍ക്കി- സ്‌പെയിന്‍, ബെല്‍ജിയം- അയര്‍ലന്‍ഡ് മത്സരങ്ങള്‍ മാത്രമാണ് അപവാദമായി നില്‍ക്കുന്നത്. 3-0നാണ് തുര്‍ക്കിയെ സ്‌പെയിനും അയര്‍ലന്‍ഡിനെ ബെല്‍ജിയവും കീഴടക്കിയത്.

ആദ്യ മത്സരത്തിലെ ഫ്രാന്‍സിന്റെ വിജയം മുതല്‍ അനിശ്ചിതത്വത്തിന്റെ കളി തുടങ്ങുന്നതു കാണാം. റൊമാനിയക്കെതിരേ 88ാം മിനുട്ടു വരെയും 1-1 സമനിലയിലായിരുന്ന ഫ്രാന്‍സ് 89ാം മിനുട്ടില്‍ ഗോള്‍ നേടിയാണ് വിജയമുറപ്പിച്ചത്. വെയ്ല്‍സ്- സ്ലോവാക്യ മത്സരത്തില്‍ 81ാം മിനുട്ടിലായിരുന്നു വെയ്ല്‍സിന്റെ വിജയ ഗോള്‍. ഇംഗ്ലണ്ട്- റഷ്യ മത്സരത്തില്‍ 91ാം മിനുട്ടു വരെയും മുന്നില്‍ നിന്ന ഇംഗ്ലണ്ടിന്റെ ഇടനെഞ്ചു കീറിയ ഗോള്‍ പിറന്നത് 92ാം മിനുട്ടില്‍.

ജര്‍മനി- ഉക്രൈന്‍ മത്സരത്തില്‍ ജര്‍മനിയുടെ രണ്ടാം ഗോള്‍ പിറന്നതും 92ാം മിനനുട്ടിലായിരുന്നു. സ്‌പെയിന്‍- ചെക്ക് റിപ്പബ്ലിക്ക് മത്സരത്തില്‍ സ്‌പെയിനിന്റെ വിജയ ഗോള്‍ 87ാം മിനുട്ടിലായിരുന്നു. ബെല്‍ജിയം ഇറ്റലി മത്സരത്തില്‍ ഇറ്റലിയുടെ രണ്ടാം ഗോള്‍ പിറന്നതും 92ാം മിനുട്ടില്‍. ഫ്രാന്‍സിന്റെ രണ്ടാം മത്സരത്തില്‍ അല്‍ബേനിയക്കെതിരേ ഒരു ഗോള്‍ 90ാം മിനുട്ടിലും രണ്ടാമത്തെ ഗോള്‍ 96ാം മിനുട്ടിലുമാണ് പിറന്നത്. ഇംഗ്ലണ്ട്- വെയ്ല്‍സ് മത്സരത്തില്‍ ഇംഗ്ലണ്ടിന്റെ വിജയ ഗോള്‍ വന്നത് 91ാം മിനുട്ടിലായിരുന്നു. ഉത്തര അയര്‍ലന്‍ഡ്- ഉക്രൈന്‍ മത്സരത്തില്‍ 96ാം മിനുട്ടിലായിരുന്നു അയര്‍ലന്‍ഡിന്റെ രണ്ടാം ഗോള്‍ പിറന്നത്. സ്വീഡന്‍- ഇറ്റലി മത്സരത്തില്‍ 88ാം മിനുട്ടില്‍ ഗോള്‍ നേടിയാണ് ഇറ്റലി വിജയം ഉറപ്പിച്ചത്. ആവേശം നിറഞ്ഞ ചെക്ക് റിപ്പബ്ലിക്ക്- ക്രൊയേഷ്യ മത്സരത്തില്‍ ചെക്ക് സമനില ഗോള്‍ നേടിയത് 93ാം മിനുട്ടിലായിരുന്നു.

2-1നു വിജയിച്ചു നിന്ന മത്സരം അതോടെ ക്രൊയേഷ്യക്ക് അടിയറ വയ്‌ക്കേണ്ടി വന്നു. ഈ ഗ്രൂപ്പില്‍ ഇപ്പോള്‍ പെട്ടിരിക്കുന്നതും ക്രൊയേഷ്യ തന്നെ. അവസാന മത്സരത്തില്‍ സ്‌പെയിനാണ് അവരുടെ എതിരാളി. വിജയിച്ചാല്‍ അവര്‍ക്ക് നോക്കൗട്ട് ഘട്ടം ഉറപ്പാക്കാം. മറിച്ചാണെങ്കില്‍ മറ്റു ടീമുകളുടെ ഫലങ്ങളും ആശ്രയിച്ചാണ് അവരുടെ ഭാവിയെന്നു ചുരുക്കം.