പട്ടിക്കാട്: ഗവ.ഹയര്‍ സെക്കന്ററി സ്‌കൂളിലെ പൂര്‍വ വിദ്യാര്‍ത്ഥികളായ നിയമസഭാ സമാജികര്‍ ഇന്ന് വീണ്ടും സ്വന്തം കലാലയ മുറ്റത്തേക്ക്. സ്പീക്കര്‍ പി.ശ്രീരാമക്യഷ്ണന്‍, വള്ളിക്കുന്ന് മണ്ഡലം എം.എല്‍.എ പി.അബ്ദുല്‍ ഹമീദ് മാസ്റ്റര്‍, സ്‌കൂള്‍ ഉള്‍പ്പെടുന്ന മഞ്ചേരി മണ്ഡലം എം.എല്‍.എ അഡ്വ.എം.ഉമ്മര്‍ എന്നിവരാണ് മാത്യവിദ്യാലയത്തിലെത്തുന്നത്. മൂവരും വിവിധ കാലങ്ങളിലായി പട്ടിക്കാട് സ്‌കൂളില്‍ പഠിച്ചവരാണ്. സ്‌കൂളിനായി പട്ടിക്കാട് സര്‍വ്വീസ് സഹകരണ ബാങ്ക് നിര്‍മ്മിച്ചു നല്‍കിയ പ്രവേശന കവാടത്തിന്റെ ഉദ്ഘാടനവുമായി ബന്ധപ്പെട്ടാണ് ജനപ്രതിനിധികളെത്തുന്നത്.
ഇവര്‍ക്ക് ഊഷ്മളമായ സ്വീകരണം നല്‍കാനുള്ള ഒരുക്കത്തിലാണ് വിദ്യാര്‍ത്ഥികളും അധ്യാപകരും നാട്ടുകാരും പി.ടി.എ മാനേജ്‌മെന്റ് ഭാരവാഹികളും. വൈകീട്ട് നാലിന് സ്‌കൂള്‍ അങ്കണത്തിലാണ് പരിപാടി. എട്ടു ലക്ഷം രൂപ ചെലവില്‍ നിര്‍മ്മിച്ച പ്രവേശന കവാടത്തിന്റെ ഉദ്ഘാടനം സ്പീക്കര്‍ പി.ശ്രീരാമക്യഷ്ണന്‍ നിര്‍വഹിക്കും. പട്ടിക്കാട് സ്വദേശിയും ബാങ്ക് പ്രസിഡന്റ് കൂടിയായ പി.അബ്ദുല്‍ ഹമീദ് മാസ്റ്റര്‍ അധ്യക്ഷനാകും. കഴിഞ്ഞ അധ്യായന വര്‍ഷത്തെ എസ്.എസ്.എല്‍.സി, പ്ലസ്ടു പരീക്ഷകളിലെ ഉന്നത വിജയികള്‍ക്ക് അഡ്വ.എം.ഉമ്മര്‍ എം.എല്‍.എ സമ്മാനങ്ങള്‍ വിതരണം ചെയ്യും.