കൊപ്പം: ബജറ്റില്‍ പ്രഖ്യാപിച്ച തിരുവേഗപ്പുറ റെഗുലേറ്റര്‍ കം ബ്രിഡ്ജ് പാലക്കാട് മലപ്പുറം ജില്ലകളിലെ വിവിധ പഞ്ചായത്തുകളിലെ കുടിവെള്ളത്തിന് മുതല്‍കൂട്ടാവും. മുപ്പത് കോടി സംസ്ഥാന ബജറ്റില്‍ വകയിരുത്തിയ ഈ പദ്ധതി നടപ്പിലാക്കുന്നത് വളരെ പ്രതീക്ഷയോടെയാണ് ഇരു ജില്ല കളിലുമുള്ള കുന്തിപ്പുഴയോരത്തെ നിവാസികള്‍ നോക്കിക്കാണുന്നത്. കടുത്ത വേനലിലിനെ പലപ്പോഴും അതി ജീവിക്കാറുള്ള കുന്തിപ്പുഴ ഇത്തവണ വറ്റിവരണ്ടു. പാലക്കാട് ജില്ലയിലെ കുലുക്കല്ലൂര്, തിരുവേഗപ്പുറ, വിളയൂര്‍, പരുതൂര്‍, മലപ്പുറം ജില്ലയിലെ പുലാമന്തോള്‍, മൂര്‍ക്കനാട്, ഇരിമ്പിളിയം തുടങ്ങിയ പഞ്ചായത്തുകളിലെ ജനങ്ങള്‍ ഈ പുഴയെയാണ് ആശ്രയിക്കുന്നത്. പുഴയോരത്തെ വീടുകളിലെ കിണറുകളെല്ലാം വറ്റിവരണ്ടു. ജില്ലാ പഞ്ചായത്ത് വിളയൂരില്‍ നിര്‍മിച്ച തടയണയില്‍ വെള്ളം കുറഞ്ഞത് കാരണം പമ്പിങ്ങ് പോലും മുടങ്ങുമെന്ന വക്കിലെത്തി. താല്‍കാലികമായി നിര്‍മിച്ച പല തടയണകളും പൂര്‍ണമായി വറ്റിവരണ്ടിരുന്നു. എന്നാല്‍  കാഞ്ഞിരപ്പുഴ അണക്കെട്ട് തുറന്നതും വിവിധ പ്രദേശങ്ങളില്‍ മഴപെയ്തതും വിളയൂര്‍ അടക്കമുള്ള സ്ഥിരമായതും താത്കാലികവുമായ തടയണകളിലെല്ലാം വെള്ളമെത്തുകയും  തടയണകള്‍ നിറഞ്ഞു കവിഞ്ഞതോടെ മണ  പമ്പിങ് നിറുത്തിവെച്ചിരുന്ന  കുടിവെള്ളപദ്ധതികള്‍ പ്രവര്‍ത്തിച്ചു തുടങ്ങി. അതെസമയം താത്കാലിക തടയണകള്‍ കാരണം  തടയണകള്‍ക്ക് താഴെയുള്ള പ്രദേശങ്ങളില്‍ വെള്ളമെത്തിയിട്ടില്ല. തടയണകള്‍ നിറയാത്തതാണ് കാരണം. മഴ മാറി നിന്നാല്‍ ഇനിയും കുടിവെള്ളം രൂക്ഷമാകും. ഇതിനെല്ലാമുള്ള ഒരു പരിഹാരമാകും തിരുവേഗപ്പുറയിലെ റെഗുലേറ്റര്‍ കം ബ്രിഡ്ജ് എന്ന പ്രതീക്ഷയിലാണ് പുഴയോര പഞ്ചായത്തുകളിലെ നിവാസികള്‍.