ചെങ്ങന്നൂര്‍: വിദ്യാര്‍ഥികള്‍ പരിസ്ഥിതി സംരക്ഷകരായി മാതൃകകാട്ടി. ചെങ്ങന്നൂര്‍ ക്രിസ്ത്യന്‍ കോളജ് വിദ്യാര്‍ഥികളാണ് തൊഴിലിന്റെ മഹത്വത്തിനൊപ്പം പരിസ്ഥിതി സംരക്ഷക പ്രവര്‍ത്തനങ്ങളില്‍ തങ്ങളുടേതായ ഇടപെടലിലൂടെ മാതൃകയായത്. സംസ്ഥാന പരിസ്ഥിതി കാലാവസ്ഥാ വ്യതിയാന വകുപ്പിന്റെ സഹകരണത്തോടെ ഭൂമിത്ര സേനാ ക്ലബിന്റെ ആഭിമുഖ്യത്തില്‍ സംഘടിപ്പിച്ച പരിസ്ഥിതി സംരക്ഷണ പദ്ധതിയുടെ ഉദ്ഘാടന വേളയിലാണ് വിദ്യാര്‍ഥികള്‍ക്ക് ഇത്തരം ഒരു അവസരം ഒരുക്കിയത്.
ബുധനൂര്‍ പഞ്ചായത്തില്‍ കഴിഞ്ഞ 12 വര്‍ഷമായി വൃത്തിഹീനമായിചപ്പുചവറുകളും മാലിന്യങ്ങളും നിറഞ്ഞ നീര്‍ത്തടം വിദ്യാര്‍ഥികള്‍ മുന്‍കൈ എടുത്ത് വൃത്തിയാക്കി. സമീപമുള്ള കിണറുകളിലെ ജല സ്രോതസായിരുന്നു ഈ കുളം. കുളം പുനരുജ്ജീവനപ്രവര്‍ത്തനങ്ങള്‍ക്കു ശേഷം മണ്ണൊലിപ്പ് തടയുന്നതിന് കുളക്കരയില്‍ ഉടനീളം രാമച്ചത്തിന്റെ തൈകള്‍ നട്ടുപിടിപ്പിച്ചു.
കോളജിലെ എന്‍.എസ്.എസ്, ജൈവ വൈവിദ്യ ക്ലബ്, നേച്ചര്‍ ക്ലബ്എന്നീ ക്ലബുകളിലെ വിദ്യാര്‍ഥികള്‍ക്കൊപ്പം പൂര്‍വ വിദ്യാര്‍ഥികളും അധ്യാപകരും പങ്കെടുത്തു. പ്രവര്‍ത്തനങ്ങള്‍ക്ക് പദ്ധതി കണ്‍വീനര്‍ ഡോ. ആര്‍. അഭിലാഷ്, ഡോ. ജേക്കബ് ജോര്‍ജ്ജ്,
ഡോ. വിനോയ് തോമസ്, ഡോ. പ്രീതാ കാരണവര്‍,പ്രൊഫ.ബിജി ഏബ്രഹാം നേതൃത്വം നല്‍കി.