ആലപ്പുഴ: എസ്.എസ്.എല്‍.സി പരീക്ഷയില്‍ ജില്ലയില്‍ പരീക്ഷയെഴുതിയ 23820 കുട്ടികളില്‍ 23539 പേര്‍ ഉപരിപഠനത്തിനുള്ള അര്‍ഹത നേടി.
ഇതില്‍ 1721 പേര്‍ എല്ലാ വിഷയത്തിലും എ പ്ലസ് കരസ്ഥമാക്കി. 98.82 ആണ് ജില്ലയുടെ വിജയശതമാനം.
104 സ്‌കൂളുകള്‍ 100 ശതമാനം വിജയം കരസ്ഥമാക്കി. തോല്‍വി അറിഞ്ഞത് വെറും 281 പേര്‍ മാത്രം. ജില്ലയുടെ വിജയശതമാനം മുന്‍ കൊല്ലത്തേക്കാള്‍ വര്‍ധിച്ചു.
മുന്‍ കൊല്ലം 98.2 ആയിരുന്നത് ഇത്തവണ 98.82 ആയി. 2016ല്‍ 98.72 ആയിരുന്നു ജില്ലയിലെ വിജയശതമാനം. മുഴുവന്‍ വിഷയങ്ങള്‍ക്കും എ പ്ലസ് നേടിയ വിദ്യാര്‍ഥികളുടെ എണ്ണവും ഇരട്ടിയോളമായി വര്‍ധിച്ചു.
കഴിഞ്ഞ വര്‍ഷം 934 പേര്‍ക്ക് എല്ലാ വിഷയത്തിനും എ പ്ലസ് കരസ്ഥമായപ്പോള്‍ ഇക്കുറി ഇത് 1721 ആയി വര്‍ധിച്ചു. നൂറുമേനി വിജയം നേടിയ സ്‌കൂളുകളുടെ എണ്ണവും വര്‍ധിച്ചു. കഴിഞ്ഞ വര്‍ഷം 90 സ്‌കൂളുകള്‍ നൂറുമേനി വിജയം കൊയ്തപ്പോള്‍ ഇക്കുറി ഇത് 104 ആയി വര്‍ധിച്ചു.ഇത്തവണയും 100 ശതമാനം വിജയം കരസ്ഥമാക്കിയ സ്‌കൂളുകള്‍ ഏറ്റവുമധികം മാവേലിക്കര വിദ്യാഭ്യാസ ജില്ലയില്‍ തന്നെയാണ്.ഇവിടെ 38 സ്‌കൂളുകളില്‍ പരീക്ഷയെഴുതിയ മുഴുവന്‍ വിദ്യാര്‍ഥികളും വിജയിച്ചു. കുട്ടനാട് വിദ്യാഭ്യാസ ജില്ലയില്‍ പരീക്ഷയെഴുതിയ 2268 കുട്ടികളില്‍ 2257 വിദ്യാര്‍ഥികളും വിജയിച്ചതോടെ നൂറു ശതമാനം പേരും വിജയിച്ച വിദ്യാഭ്യാസ ജില്ലയെന്ന ഖ്യാതി കുട്ടനാടിന് സ്വന്തമായി.
ചേര്‍ത്തല, ആലപ്പുഴ വിദ്യാഭ്യാസ ജില്ലകളുടേത് 99 ശതമാനവും മാവേലിക്കരയുടേത് 98 ശതമാനവുമാണ് വിജയം കണക്കാക്കിയിട്ടുള്ളത്.ഏറ്റവുമധികം വിദ്യാര്‍ഥികളെ പരീക്ഷക്കിരുത്തിയതും വിജയിപ്പിച്ചതും ഇക്കുറിയും മാവേലിക്കര വിദ്യാഭ്യാസ ജില്ല തന്നെയാണ്. 7701 വിദ്യാര്‍ഥികള്‍ ഇവിടെ പരീക്ഷയെഴുതി. 7578 പേര്‍ വിജയിച്ചു. വിജയശതമാനം 98.
ആലപ്പുഴ വിദ്യാഭ്യാസ ജില്ലയില്‍ 6901 പേര്‍ പരീക്ഷയെഴുതിയതില്‍ 6843 പേര്‍ വിജയിച്ചു. ചേര്‍ത്തല വിദ്യാഭ്യാസ ജില്ലയില്‍ 6950 പേര്‍ പരീക്ഷയെഴുതിയതില്‍ 6861 പേര്‍ വിജയിച്ചു.

104 സ്‌കൂളുകള്‍ക്ക് നുറുമേനി വിജയം

ആലപ്പുഴ: എസ്.എസ്.എല്‍.സി പരീക്ഷയില്‍ ജില്ലയില്‍ ആകെയുള്ള സ്‌കൂളുകളില്‍ 104 സ്‌കൂളുകള്‍ നൂറുമേനി വിജയം കരസ്ഥമാക്കി.
ഏറ്റവും കൂടുതല്‍ വിദ്യാര്‍ഥികളെ പരീക്ഷക്കിരുത്തിയ മാവേലിക്കര വിദ്യഭാസ ജില്ലയിലാണ് ഏറ്റവും കൂടുതല്‍ നൂറ് മേനി സ്‌കൂളുകളും. ഇവിടെ 38 സ്‌കൂളുകള്‍ നൂറ് മേനി വിജയം കരസ്ഥമാക്കി.
എ പ്ലസുകാര്‍ ഏറ്റവും കൂടുതല്‍ മാവേലിക്കരയില്‍
ആലപ്പുഴ: ജില്ലയില്‍ 1721 വിദ്യാര്‍ഥികള്‍ എല്ലാ വിഷയത്തിനും എ പ്ലസ് കരസ്ഥമാക്കി.മുന്‍ വര്‍ഷത്തേതിന്റെ ഇരട്ടിയോളം വരും ഇത്തവണത്തെ എ പ്ലസുകാരുടെ എണ്ണം. റീ വാല്യുവേഷനില്‍ എ പ്ലസുകാരുടെ എണ്ണം ഇനിയും വര്‍ധിച്ചേക്കും.
മുന്‍ വര്‍ഷം 934 പേരാണ് എല്ലാ വിഷയത്തിനും എ പ്ലസ് കരസ്ഥമാക്കിയത്. എ പ്ലസുകാര്‍ ഏറ്റവും കൂടുതല്‍ മാവേലിക്കരയിലാണ്. 673 പേര്‍ ഇവിടെ എല്ലാ വിഷയത്തിനും എ പ്ലസ് കരസ്ഥമാക്കി.
തൊട്ടുപിന്നില്‍ ആലപ്പുഴ വിദ്യാഭ്യാസ ജില്ലയാണ്. 517 പേര്‍ ഇവിടെ എല്ലാ വിഷയത്തിനും എ പ്ലസ് നേടി. ചേര്‍ത്തലയില്‍ 382 കുട്ടികളും കുട്ടനാട്ടില്‍ 149 കുട്ടികളും എല്ലാ വിഷയത്തിനും എ പ്ലസ് കരസ്ഥമാക്കി.