ഉച്ചവെയില്‍ തിന്നുന്ന
പക്ഷി തണല്‍ തേടുന്നു
കൊയ്ത്തു കഴിഞ്ഞ പാടങ്ങളില്‍.
കരള്‍ കൊത്തിവലിക്കുന്ന
ദാഹം കിണറ്റിന്‍കരയില്‍ നിന്ന്
തൊട്ടിക്കൊപ്പം ആഴം തിരയുന്നു.     
ഇലയുണങ്ങിയ
ഒറ്റമരക്കൊമ്പിലിരുന്നൊരു
കുരുവി
ദാഹം തീര്‍ന്ന പകലുകളെ
സ്വപ്നം കാണുന്നു.
ക്ഷയിച്ചു പോയ
തറവാട്ടു കാരണവരെപ്പോലെ
ഒരു മീന്‍ പുഴക്കരയില്‍
കിടന്നു പിടയ്ക്കുന്നു.
വെയില്‍ തിന്ന് തീര്‍ക്കുന്ന
സങ്കടത്താല്‍ വേനലവധി
കരണം മറിയാനാകാതെ
കുളക്കടവില്‍
കൂനിക്കൂടിയിരിക്കുന്നു.
വിണ്ടുപോയ പകലുകളെ
മഞ്ഞവെയില്‍ രാത്രിയിലേക്ക്
വഴി നടത്തുന്നു.
വിരുന്നു വന്ന
വിങ്ങല്‍ പാതിരാവിനെ വിയര്‍പ്പിക്കുന്നു.
സ്വപ്നങ്ങളിലെ
മഴയ്ക്കു മുകളിലും
വെയിലറച്ച് തുടങ്ങിയിരിക്കുന്നു.