ചവറ: കെ.എസ്.ആര്‍.ടി.സി ഫാസ്റ്റ് പാസഞ്ചര്‍ ബസിടിച്ച് പെട്ടിഓട്ടോറിക്ഷ താഴ്ച്ചയിലേയ്ക്ക് മറിഞ്ഞ് രണ്ടുപേര്‍ക്ക് പരുക്കേറ്റു. പുത്തന്‍സങ്കേതം വടക്ക് നാസില മന്‍സിലില്‍ അഷറഫ് (53), പടപ്പനാല്‍ നാടകശാല വടക്കതില്‍ ഇര്‍ഷാദ് (26) എന്നിവര്‍ക്കാണ് അപകടത്തില്‍ പരുക്കേറ്റത്. ഇരുവരും പെട്ടിഓട്ടോറിക്ഷ യാത്രികരായിരുന്നു. ഇന്നലെ രാവിലെ 11ന് ദേശീയ പാതയില്‍ ചവറ നല്ലേഴ്ത്ത് മുക്കിന് തെക്ക് ഭാഗത്താണ് അപകടം. കായംകുളത്ത് നിന്നും കൊല്ലത്തേയ്ക്ക് പോകുകയായിരുന്ന ബസ് മുന്‍പേ പോകുകയായിരുന്ന പെട്ടിഓട്ടോറിക്ഷയുടെ പിന്നില്‍  ഇടിച്ചു. ഇടിയുടെ ആഘാതത്തില്‍ ഫ്രൂട്ട്‌സ് കയറ്റിവന്ന പെട്ടി ഓട്ടോറിക്ഷ നിയന്ത്രണം വിട്ട്  ദേശീയപാതയുടെ കിഴക്ക് വശത്തുള്ള താഴ്ചയിലേയ്ക്ക് കരണം മറിയുകയായിരുന്നു.
കരുനാഗപ്പള്ളിയില്‍ നിന്നു പഴവര്‍ഗങ്ങള്‍ കയറ്റി ചവറയിലേയ്ക്ക് വരികയായിരുന്നു പെട്ടിഓട്ടോറിക്ഷ .അപകടത്തില്‍ പെട്ടിഓട്ടോറിക്ഷ തകര്‍ന്നു. പഴവര്‍ഗങ്ങളും നശിച്ചു. അപകടത്തില്‍പ്പെട്ടവരെ അതു വഴി വന്ന യാത്രികരും നാട്ടുകാരും ചേര്‍ന്ന്  തട്ടാശ്ശേരിയിലുള്ള സ്വകാര്യ ആശുപ്പത്രിയിലും തുടര്‍ന്ന് ജില്ലാ ആശുപത്രിയിലും എത്തിച്ചു.