വടകര: നിര്‍ത്തിയിടുന്ന ബസുകളിലെ ബാറ്ററി മോഷ്ടിക്കുന്ന സംഘം വിലസുന്നു. കൈനാട്ടി, ജനതാ സ്റ്റോപ്പ്, പുഞ്ചിരി മില്ല് തുടങ്ങിയ സ്ഥലങ്ങളില്‍ നിര്‍ത്തിയിടുന്ന ബസുകളില്‍ നിന്നാണ് ബാറ്ററി മോഷണം പോകുന്നത്.
ബസുകളില്‍ നിന്ന് ബാറ്ററി അഴിച്ചുമാറ്റി മോഷ്ടിക്കുന്ന സംഘം കഴിഞ്ഞ മൂന്നു മാസമായി മേഖലയില്‍ സജീവമാണ്. നേരത്തെ തന്നെ ഇത്തരം സംഭവങ്ങള്‍ റിപ്പോര്‍ട്ട് ചെയ്തിരുന്നെങ്കിലും കഴിഞ്ഞ ഏതാനും മാസങ്ങളായി ബാറ്ററി മോഷണം വ്യാപകമായിരിക്കുകയാണ്. പുലര്‍ച്ചെ സമയങ്ങളിലാണു ബാറ്ററി മോഷണം നടക്കുന്നത്.
ദേശീയപാതയില്‍ കഴിഞ്ഞ ഏതാനും മാസത്തിനുള്ളില്‍ പത്തോളം ബസുകളില്‍ നിന്ന് ബാറ്ററി മോഷണം പോയിട്ടുണ്ട്. ബസുടമകള്‍ക്കു വലിയ സാമ്പത്തിക നഷ്ടമുണ്ടാകുമെന്നതിനു പുറമെ മോഷ്ടാക്കളെ പേടിച്ചിട്ട് ബസ് നിര്‍ത്തിയിടാനാവാത്ത സാഹചര്യവും നിലനില്‍ക്കുകയാണ്.
ബാറ്ററി മോഷണം ബസുടമകള്‍ പൊലിസിന്റെ ശ്രദ്ധയില്‍ പെടുത്തിയിട്ടുണ്ട്. മോഷ്ടാക്കളെ ഉടന്‍ അറസ്റ്റ് ചെയ്യണമെന്ന് വടകര പ്രൈവറ്റ് ബസ് ഓപറേറ്റേഴ്‌സ് അസോസിയേഷന്‍ ആവശ്യപ്പെട്ടു.