തിരുവനന്തപുരം: ഓള്‍ കേരള ബസ് ഓപറേറ്റേഴ്‌സ് അസോസിയേഷന്‍സ് കോ ഓര്‍ഡിനേഷന്‍ കമ്മിറ്റി സെക്രട്ടേറിയറ്റിന് മുന്നില്‍ 24 മണിക്കൂര്‍ രാപകല്‍ സത്യഗ്രഹം തുടങ്ങി.
വിദ്യാര്‍ഥികളുടെ യാത്രാനിരക്ക് വര്‍ധിപ്പിക്കുക, നിരക്ക് വര്‍ധനയില്ലെങ്കില്‍ ഡീസല്‍ വിലയുടെ അധിക നിരക്ക് സബ്‌സിഡിയായി അനുവദിക്കുക തുടങ്ങിയ ആവശ്യങ്ങള്‍ ഉന്നയിച്ചാണ് സത്യഗ്രഹം.
കോ ഓര്‍ഡിനേഷന്‍ കമ്മിറ്റി കണ്‍വീനര്‍ ടി ഗോപിനാഥന്‍ ഉദ്ഘാടനം ചെയ്തു. വിദ്യാര്‍ഥികളുടെ യാത്രാനിരക്കില്‍ വര്‍ധനവ് നടപ്പിലാക്കിയില്ലെങ്കില്‍ ഡീസലിന്റെ അധിക നിരക്ക് സബ്‌സിഡിയായി നല്‍കാന്‍ സര്‍ക്കാര്‍ തയാറാകണമെന്നും ഇല്ലെങ്കില്‍ സര്‍വിസ് നിര്‍ത്തി വയ്ക്കുന്നത് ഉള്‍പ്പെടെയുള്ള ശക്തമായ സമരപരിപാടികള്‍ ആരംഭിക്കേണ്ടി വരുമെന്നും അദ്ദേഹം പറഞ്ഞു.
നൗഷാദ് ആറ്റുപറമ്പത്ത്,പി കെ മൂസ, ജോയ് തട്ടത്തില്‍, എന്‍ വിദ്യാധരന്‍, വി എസ് പ്രദീപ്, പി കെ പവിത്രന്‍, കെ എ സലീം, ജയാനന്ദ് തുടങ്ങിയവര്‍ പ്രസംഗിച്ചു.