ആലത്തൂര്‍: സേവനാവകാശ നിയമവും വിവരാവകാശ നിയമവും 1986-ലെ കണ്‍സ്യൂമര്‍ പ്രൊട്ടക്ഷന്‍ ആക്റ്റും നടപ്പാക്കുന്നതിന് മുന്‍പ് തന്നെ 100 കണക്കിന് പരാതികള്‍ അനുരഞ്ജനത്തിലൂടെ പരിഹരിച്ച ചരിത്രമാണ് ആലത്തൂര്‍ താലൂക്ക് കണ്‍സ്യൂമര്‍ പ്രൊട്ടക്ഷന്‍ ഫോറത്തിന്റേത്. 1991 ഒക്‌ടോബര്‍ ഒന്‍പതിനാണ് ഫോറം പ്രവര്‍ത്തനം തുടങ്ങിയത്. സര്‍ക്കാര്‍ സര്‍വീസില്‍നിന്ന് വിരമിച്ച ഗവ.സെക്രട്ടറിയായ പി. ഗോവിന്ദന്‍ മുതല്‍ വിവിധ വകുപ്പുകളില്‍നിന്നും വിരമിച്ച ഉദ്യോഗസ്ഥരുടെ കൂട്ടായ്മയാണ് പ്രവര്‍ത്തനങ്ങള്‍ക്ക് നേതൃത്വം നല്‍കിയത്.
ആദ്യ സെക്രട്ടറിയായ ടി.കെ. ദിവാകരന്‍ മാസ്റ്റര്‍ തന്നെയാണ് ഇന്നും സെക്രട്ടറി. പ്രതിഫലം വാങ്ങാതെ സാധാരണക്കാര്‍ക്ക് നീതിലഭ്യമാക്കുകയെന്ന സ്ഥാപക അംഗങ്ങളുടെ പ്രവര്‍ത്തന മാതൃക പിന്തുടരുന്ന ഫോറം കൃത്യമായി എല്ലാ ശനിയാഴ്ചയും ആലത്തൂര്‍ താലൂക്ക് സമ്മേളനഹാളില്‍ യോഗം ചേരും. ഓരോ പഞ്ചായത്തിലുമുള്ള എക്‌സിക്യൂട്ടീവ് കമ്മിറ്റി അംഗങ്ങള്‍ കൊണ്ടു വരുന്ന പരാതികള്‍ ചര്‍ച്ച ചെയ്ത് അനുരഞ്ജനത്തിലൂടെ പരിഹരിക്കുകയാണ് ഫോറത്തിന്റെ നയം.
ചുരുക്കം ചില പരാതികള്‍ മാത്രമാണ് ഉപഭോക്തൃ തര്‍ക്ക പരിഹാരം കോടതിയിലേയ്ക്ക് കൈമാറുന്നത്. അംഗങ്ങള്‍ സ്വന്തം പണം സമാഹരിച്ചാണ് പ്രവര്‍ത്തനങ്ങള്‍ മുന്നോട്ട് കൊണ്ടുപോവുന്നത്. ഓരോ കാലഘട്ടത്തിലും അതത് താലൂക്ക് സപ്ലൈ ഓഫിസര്‍മാര്‍, പൊലിസ്-ജുഡീഷല്‍ അംഗങ്ങള്‍ എന്നിവരുടെ സഹകരണമുണ്ടായിരുന്നതായും സെക്രട്ടറി പറഞ്ഞു. താലൂക്ക് സപ്ലൈ ഓഫിസര്‍മാരുടെ നേതൃത്വത്തില്‍ വിവിധ മേഖലകളിലുള്ളവര്‍ക്ക് ബോധവത്കരണ ക്ലാസും ഫോറം നടത്തുന്നുണ്ട്.