മലപ്പുറം: പത്തെഴുത്തിന്റെ മിന്നുംജയത്തിനു പിന്നാലെ പ്ലസ്ടു ഫലത്തിലും ജില്ലക്ക് നേട്ടം. കഴിഞ്ഞവര്‍ഷത്തെ അപേക്ഷിച്ച് വിജയ ശതമാനത്തിലും എ പ്ലസുകളുടെ എണ്ണത്തിലും കുതിപ്പു നടത്തിയ ജില്ല ഉപരിപഠനത്തിന് യോഗ്യത നേടിയവരുടെ എണ്ണത്തിലും സംസ്ഥാനത്ത് ഒന്നാമതെത്തി. പതിനേഴ് പേര്‍ ഇത്തവണ പ്ലസ് വണിലെയും പ്ലസ്ടുവിലേയും മുഴുവന്‍ മാര്‍ക്കായ 1200 നേടി. ഹയര്‍ സെക്കന്‍ഡറി സ്്കൂള്‍ ഗോയിങ് വിഭാഗത്തില്‍ 85.52 ശതമാനം വിദ്യാര്‍ഥികളാണ് ഇത്തവണ ഉപരിപഠന യോഗ്യത നേടിയത്്.
കഴിഞ്ഞതവണ 81.43 ശതമാനമായിരുന്നു വിജയം. വിജയ ശതമാനത്തില്‍ ഒന്‍പതാം സ്ഥാനത്തുണ്ടായിരുന്ന ജില്ല ഇത്തവണ ഏഴാമതെത്തി. സംസ്ഥാനത്ത് ഏറ്റവും കൂടുതല്‍ വിദ്യാര്‍ഥികളെ പരീക്ഷക്കിരുത്തി കൂടുതല്‍ വിദ്യാര്‍ഥികള്‍ ഉപരിപഠനത്തിന് യോഗ്യത നേടിയ ജില്ലയെന്ന നേട്ടം ഇത്തവണയും മലപ്പുറത്തിനാണ്. ജില്ലയിലെ 244 സ്‌കൂളുകളിലായി 53,915 വിദ്യാര്‍ഥികളാണ് ഇത്തവണ പരീക്ഷ എഴുതിയത്. ഇതില്‍ 46,110 വിദ്യാര്‍ഥികള്‍ ഉപരിപഠന യോഗ്യത നേടി. 2015 ല്‍ 85.55 ഉം, 2016 ല്‍ 81.08 ഉം ആയിരുന്നു ജില്ലയുടെ വിജയശതമാനം.
ടെക്‌നിക്കല്‍ ഹയര്‍ സെക്കന്‍ഡറി വിഭാഗത്തില്‍ പരീക്ഷ എഴുതിയ 294 വിദ്യാര്‍ഥികളില്‍ 240 പേരാണ് ഉപരിപഠനത്തിന് യോഗ്യത നേടിയത്. 81.63 ശതമാനം വിജയം. 84.04 ശതമാനമായിരുന്നു കഴിഞ്ഞവര്‍ഷത്തെ വിജയ ശതാമാനം. സ്‌കോള്‍ കേരള(ഓപണ്‍ സ്‌കൂള്‍)വിഭാഗത്തിലും സംസ്ഥാനത്ത് കൂടുതല്‍ വിദ്യാര്‍ഥികള്‍ പരീക്ഷക്കിരുന്നത് ജില്ലയിലാണ്. 21,379 വിദ്യാര്‍ഥികള്‍ പരീക്ഷ എഴുതിയ ജില്ലയില്‍ 8,093 പേരാണ് വിജയിച്ചത്. 37.85 ശതമാനം വിജയം. കഴിഞ്ഞ വര്‍ഷം 27.5 ശതമാനമായിരുന്നു ജയം. സംസ്ഥാന തലത്തില്‍ ഏറ്റവും കൂടുതല്‍ കുട്ടികള്‍ പരീക്ഷ എഴുതിയ സ്‌കൂളുകളാണ് ജില്ലയിലെ 721 കുട്ടികള്‍ പരീക്ഷ എഴുതിയ പാലേമേട് എസ്.വി ഹയര്‍ സെക്കന്‍ഡറി സ്‌കൂള്‍(83.63 ശതമാനം വിജയം), 694 പേര്‍ പരീക്ഷ എഴുതിയ കല്ലിങ്ങല്‍പറമ്പ് എം.എസ്.എം ഹയര്‍ സെക്കന്‍ഡറി സ്‌കൂള്‍(94.52 ശതമാനം വിജയം).