മോസ്‌കോ: റഷ്യന്‍ ലോകകപ്പിനുള്ള ബ്രസീല്‍ ടീമിനെ തിങ്കളാഴ്ച പ്രഖ്യാപിക്കും. 23 അംഗ ടീമില്‍ ആരൊക്കെയുണ്ടാകുമെന്ന കാര്യത്തില്‍ ഇതുവരെയും സൂചനയൊന്നും ലഭിച്ചിട്ടില്ല. അതേ സമയം കഴിഞ്ഞ മത്സരത്തിനിടെ പരുക്കേറ്റ പി. എസ്. ജി താരം ഡാനി ആല്‍വേസിന്റെ കാര്യത്തില്‍ ആശങ്കയുണ്ട്. ആല്‍വേസിന്റെ പരുക്കിനെ കുറിച്ച് നാളെ നടക്കുന്ന സ്‌കാനിങ്ങിനു ശേഷമേ അന്തിമ അഭിപ്രായം പറയാനാകൂ എന്ന നിലപാടിലാണ് ഡോക്ടര്‍മാര്‍. ഒരു പക്ഷെ ആല്‍വേസ് ടീമിലുള്‍പ്പെട്ടിട്ടില്ലെങ്കില്‍ ബ്രസീലിന് വലിയ തലവേദനയാകും. പരുക്ക് മാറി പി. എസ്. ജിയില്‍ പരിശീലനത്തിനെത്തിയ നെയ്മന്‍ എന്തായാലും 23 അംഗ ടീമിലുണ്ടാകും. ബ്രസീലിയന്‍ ലീഗില്‍ മികച്ച പ്രകടനം പുറത്തെടുത്ത യുവതാരങ്ങളായ വിനീഷ്യസിനും ആര്‍തറിനും നറുക്ക് വീഴുമോ എന്ന് കാത്തിരിക്കുകയാണ് ഫുട്‌ബോള്‍ ലോകം.