ജെയ്പൂര്‍: ചരിത്ര സിനിമയായ 'പത്മാവതി'യുടെ ഷൂട്ടിങ്ങിനായി രാജസ്ഥാനിലെ ജെയ്പൂരിനടുത്ത കോലാപൂരില്‍ ഒരുക്കിയ സെറ്റ് ഒരു സംഘം അക്രമികള്‍ അഗ്‌നിക്കിരയാക്കി. സിനിമക്കായി എത്തിച്ച കുതിരകള്‍, സെറ്റിന്റെ സുരക്ഷാ ജീവനക്കാര്‍ എന്നിവര്‍ക്ക് പൊള്ളലേറ്റു. സംഭവത്തെ തുടര്‍ന്ന് സംവിധായകന്‍ സഞ്ജയ് ലീല ബന്‍സാലി പൊലിസില്‍ പരാതി നല്‍കി.
16ാം നൂറ്റാണ്ടില്‍ മാലിക് മുഹമ്മദ് ജയാസിയെഴുതിയ 'പത്മാവത്' എന്ന കവിതയെ ആസ്പദമാക്കിയാണ് 'പത്മാവതി' സിനിമ ഒരുക്കുന്നത്. റാണി പത്മാവതിയും ഡല്‍ഹി സുല്‍ത്താനായിരുന്ന അലാവുദീന്‍ ഖില്‍ജിയും തമ്മിലുള്ള പ്രണയമാണ് സിനിമയുടെ ഇതിവൃത്തം. എന്നാല്‍ ഇത്തരമൊരു പ്രണയം കവിതയില്‍ പ്രതിപാദിക്കുന്നില്ലെന്നും ചരിത്രത്തെ വളച്ചൊടിക്കുകയാണ് സംവിധായകന്‍ ചെയ്യുന്നതെന്നും ആരോപിച്ച് ഒരു സംഘം നേരത്തെതന്നെ സിനിമക്കെതിരേ രംഗത്ത് വന്നിരുന്നു.