ഈരാറ്റുപേട്ട: നഗരസഭ ഭരണസമിതിയില്‍ സി.പി.എമ്മും കേരളാ കോണ്‍ഗ്രസ് സെക്കുലറും തമ്മില്‍ ഭിന്നത മൂലം ഭരണം പ്രതിസന്ധിയില്‍.
നഗരസഭയില്‍ നാലര വര്‍ഷമായി അക്കൗണ്ട്‌സ് വിഭാഗത്തില്‍ ജോലി ചെയ്തിരുന്ന താല്‍ക്കാലിക ജീവനക്കാരനെ പിരിച്ചു വിട്ടതിനെ തുടര്‍ന്നുണ്ടായ അഭിപ്രായ വിത്യാസമാണ് ഭരണം പ്രതിസന്ധിയിലാക്കിയത്.
ജി.ഡി.പി ഓഫിസിലെ അക്കൗണ്ടിങ് സെല്‍ സ്ഥിരം ക്ഷണിതാവായിരുന്ന വ്യക്തിയെയാണു നഗരസഭാ പിരിച്ചുവിട്ടത്.
നഗരസഭയ്ക്കായി വലിയ ഗ്രാന്‍ുകള്‍ നേടിയെടുക്കുന്നതിനായി പരിചയ സമ്പന്നനായ ഇദ്ദേഹത്തെ തിരിച്ചെടുക്കണമെന്ന ആവശ്യമാണു തര്‍ക്കത്തിനിടയാക്കിയത്. നഗരസഭയ്ക്കു ലഭിക്കുന്ന പ്രത്യേക ഫണ്ടുകള്‍ വിനിയോഗത്തിനുള്ള പദ്ധതികള്‍ തയ്യാറാക്കുന്നതിനു പ്രത്യേക സോഫ്റ്റ് വെയറില്‍ കേരള സര്‍ക്കാര്‍ സ്ഥാപനമായ ഐ.കെ.എമ്മില്‍ നിന്നു പരിശീലനം നേടിയ വ്യക്തിയായിരുന്ന എം.ബി.എ ബിരുദധാരിയായ ഈ താല്‍ക്കാലിക ജീവനക്കാരന്‍. നിയമസഭാ തെരഞ്ഞെടുപ്പിന് മുമ്പായിരുന്നു ഇദ്ദേഹത്തെ പിരിച്ചു വിട്ടത്.
ഇതുവരെയും പകരം നിയമനവും നടത്തിയിട്ടില്ല. ഇതേത്തുടര്‍ന്ന് ലോകബാങ്കില്‍ നിന്നും ലഭിക്കേണ്ട നാലുകോടി രുപയുടെ പദ്ധതി അവതാളത്തിലാകുന്ന അവസ്ഥയാണുള്ളത്.
ഇദ്ദേഹത്തെ തിരിച്ചെടുക്കണമെന്നാവശ്യപ്പെട്ട് മുസ്‌ലിം ലീഗും കോണ്‍ഗ്രസും കൂടി ബുധനാഴ്ച ചേര്‍ന്ന കൗണ്‍സില്‍ യോഗത്തില്‍ പ്രമേയം അവതരിപ്പിച്ച് വോട്ടിനിട്ടപ്പോള്‍ ഏഴിനെതിരേ 18 വോട്ടുകള്ക്കു പ്രമേയം പാസായി. ഇതോടെ ഭരണപക്ഷത്തിനു ഭൂരിപക്ഷം നഷ്ടപ്പെട്ട അവസ്ഥ സംജാതമായി. എന്നാല്‍ കൗണ്‍സിലിന്റെ ഭൂരിപക്ഷ തീരുമാനം നടപ്പിലാക്കാന്‍ ഇതുവരെയും ചെയര്‍മാന്‍ തയാറായിട്ടില്ലാ.
 വരുംദിവസങ്ങളില്‍ പ്രശ്‌നം രൂക്ഷമാകാനാണു സാധ്യത. നിലവില്‍ ഈരാറ്റുപേട്ട നഗരസഭയില്‍ സി.പി.എം ഒന്‍പത്, മുസ്‌ലിം ലീഗ് എട്ട്, കേരളാ കോണ്‍ഗ്രസ് സെക്കുലര്‍ നാല്, എസ്.ഡി.പി.ഐ നാല്, കോണ്‍ഗ്രസ് മൂന്ന് എന്നിങ്ങനെയാണു കക്ഷിനില. ഇദ്ദേഹത്തെ തിരിച്ചെടുത്തില്ലെങ്കില്‍ നഗരസഭ ഭരണസമിതിയില്‍ സി.പി.എമ്മും കേരളാ കോണ്‍ഗ്രസ് സെക്കുലറും തമ്മില്‍ ഭിന്നത മുതലെടുത്ത് യു.ഡി.എഫ്, ഈരാറ്റുപേട്ട നഗരസഭയിലെ എല്‍.ഡി.എഫ് ഭരണം അട്ടിമറിക്കാനുള്ള നീക്കത്തിലാണ്.