ദമ്മാം: പട്രോള്‍ നടത്തുകയായിരുന്ന ട്രാഫിക് സംഘത്തിനു നേരെ സഊദിയില്‍ അജ്ഞാതരുടെ ആക്രമണം. ഒരു സുരക്ഷാ സേനാംഗം കൊല്ലപ്പെട്ടു. കിഴക്കന്‍ പ്രവിശ്യയിലെ സ്ഥിരം സംഘട്ടനങ്ങള്‍ നടക്കുന്ന ശീഈ ഭൂരിപക്ഷ പ്രദേശമായ ഖത്വീഫിലെ അവാമിയയില്‍ വെള്ളിയാഴ്ചയാണ് സംഭവം.

പതിവു പട്രോളിങില്‍ ഏര്‍പ്പെട്ട സംഘത്തിനു നേരെ നടന്ന വെടിവെപ്പില്‍ സുരക്ഷാ ഉദ്യോഗസ്ഥനായ ഫൈസല്‍ അല്‍ ഹര്‍ബിയാണ് കൊല്ലപ്പെട്ടതെന്ന് സഊദി ആഭ്യന്തര മന്ത്രാലയം പ്രസ്താവനയില്‍ വ്യക്തമാക്കി. തീവ്രവാദ ബന്ധം ഉള്‍പ്പെടുത്തി ശക്തമായ അന്വേഷണം നടത്തുന്നുണ്ട്.

അവാമിയ ഉള്‍പ്പെടുന്ന ഖത്വീഫ് മേഖലയില്‍ നിന്ന് കഴിഞ്ഞ ബുധനാഴ്ച രാത്രി പിടികിട്ടാപ്പുള്ളിയായ തീവ്രവാദിയെ പൊലിസ് വെടിവെച്ചു കൊന്നിരുന്നു. കഴിഞ്ഞ ഒക്ടോബറില്‍ നടന്ന വെടിവെപ്പില്‍ അഞ്ചു പേരും ജനുവരിയില്‍ നടന്ന ആക്രമണത്തില്‍ രണ്ട് പൊലിസുകാരും കൊല്ലപ്പെട്ടിരുന്നു. കൂടാതെ ചെറുതും വലുതുമായ നിരവധി സ്‌ഫോടനങ്ങളും വെടിവെപ്പുകളും ഈ മേഖലയില്‍ വ്യാപകമാണ്.