ലെന്‍സ്: മൂന്നു സമനിലകളുമായി പോര്‍ച്ചുഗല്‍ പ്രീ ക്വാര്‍ട്ടറിലേക്ക് യോഗ്യത നേടിയപ്പോള്‍ ആശ്വസിച്ചത് സൂപ്പര്‍ താരം ക്രിസ്റ്റ്യാനോ റൊണാള്‍ഡോയായിരിക്കും. പുറത്താകലിന്റെ വക്കില്‍ നിന്നാണ് പോര്‍ച്ചുഗലിന്റെ പ്രീ ക്വാര്‍ട്ടര്‍ പ്രവേശനം. അവസാന ഗ്രൂപ്പ് പോരില്‍ ഹംഗറിക്കെതിരേ 3-3നു സമനില പാലിച്ച മത്സരത്തില്‍ ഇരട്ട ഗോളുമായി തിളങ്ങാന്‍ ക്രിസ്റ്റ്യാനോക്ക് സാധിച്ചു.
പ്രീ ക്വാര്‍ട്ടറിലേക്ക് കടന്നതോടെ മറ്റൊരു റെക്കോര്‍ഡും ക്രിസ്റ്റ്യാനോയെ കാത്തിരിക്കുന്നു. യൂറോയില്‍ ഏറ്റവും കൂടുതല്‍ ഗോളുകള്‍ നേടിയ താരമെന്ന മുന്‍ ഫ്രഞ്ച് ഇതിഹാസം മിഷേല്‍ പ്ലാറ്റിനിയുടെ റെക്കോര്‍ഡ് മറികടക്കാനുള്ള അവസരമാണ് താരത്തിനു മുന്നില്‍.
ഒന്‍പത് ഗോളുകളുമായി റെക്കോര്‍ഡ് ബുക്കില്‍ പ്ലാറ്റിനിയുടെ പേരാണ് നിലവിലുള്ളത്. തന്റെ കരിയറിലെ നാലാം യൂറോയില്‍ കളിക്കുന്ന ക്രിസ്റ്റ്യാനോ എട്ടു ഗോളുകളുമായി രണ്ടാം സ്ഥാനത്തു നില്‍ക്കുകയാണിപ്പോള്‍. ഇന്നു ഇരട്ട ഗോളുകള്‍ നേടിയാല്‍ ക്രിസ്റ്റ്യാനോക്ക് റെക്കോര്‍ഡ് മറികടക്കാം. മറിച്ച് ഒറ്റ ഗോളാണെങ്കില്‍ പോര്‍ച്ചുഗല്‍ നായകന്‍ പ്ലാറ്റിനിയുടെ റെക്കോര്‍ഡിനൊപ്പമെത്തും.
യൂറോയില്‍ ഏറ്റവും കൂടുതല്‍ മത്സരങ്ങള്‍ കളിച്ച താരമെന്ന റെക്കോര്‍ഡുള്ള ക്രിസ്റ്റ്യാനോ 2004, 2008, 2012, 2016 ടൂര്‍ണമെന്റുകളിലായി 17 മത്സരങ്ങള്‍ കളിച്ചിട്ടുണ്ട്. ഇത്രയും മത്സരങ്ങളില്‍ നിന്നാണ് ക്രിസ്റ്റ്യാനോ എട്ടു ഗോളുകള്‍ നേടിയെതെങ്കില്‍ പ്ലാറ്റിനി 1984ല്‍ കളിച്ച ഒറ്റ ടൂര്‍ണമെന്റിലെ അഞ്ചു മത്സരങ്ങളില്‍ നിന്നു ഒന്‍പത് ഗോളുകള്‍ നേടിയാണ് റെക്കോര്‍ഡ് നേട്ടത്തിലെത്തിയെന്ന കാര്യം ശ്രദ്ധേയമാണ്.