ഹൈദരാബാദ്: ഐ ലീഗ് സെക്കന്‍ഡ് ഡിവിഷനില്‍ എഫ്.സി കേരളയെ ഫത്തേഹ് ഹൈദരാബാദ് തോല്‍പ്പിച്ചു. ഇതോടെ എഫ്.സി കേരളയുടെ ഐ ലീഗ് മോഹങ്ങള്‍ തുലാസിലായി. രണ്ട് ഗോളിന് മുന്നിട്ട് നിന്ന ശേഷമായിരുന്നു എഫ്.സി കേരളയുടെ തോല്‍വി. രണ്ടിനെതിരേ നാലു ഗോളുകള്‍ക്കാണ് എഫ്.സി കേരള പരാജയപ്പെട്ടത്.

ഹൈദരാബാദിനോട് ജയിക്കുകയും ബംഗളൂരുവില്‍ നടന്ന മത്സരത്തില്‍ ഓസോണ്‍ എഫ്.സി ബ്ലാസ്റ്റേഴ്‌സിനോട് പരാജയപ്പെടുകയും ചെയ്‌തെങ്കില്‍ മാത്രമേ എഫ്.സി കേരളക്ക് സാധ്യതയുണ്ടായിരുന്നുള്ളൂ. ഓസോണ്‍ ബ്ലാസ്റ്റേഴ്‌സിനോട് തോറ്റെങ്കിലും ഹൈദരബാദിനോട് ജയിക്കാന്‍ എഫ്.സി കേരളക്കായില്ല. ബ്ലാസ്റ്റേഴ്‌സാണ് ഗ്രൂപ്പ് ചാംപ്യന്‍മാരെങ്കിലും ഐ.എസ്.എല്‍ റിസര്‍വ് ടീമായതിനാല്‍ ബ്ലാസ്റ്റേഴ്‌സിന് സെമി ഫൈനല്‍ റൗണ്ടില്‍ പ്രവേശിക്കാനാകില്ല.

ഇതിനു പകരം രണ്ടാം സ്ഥാനത്ത് നില്‍ക്കുന്ന ഓസോണ്‍ സെമിയിലേക്ക് യോഗ്യത നേടും. ഗ്രൂപ്പില്‍ എഫ്.സി കേരള മൂന്നാമതാകും. എഫ്.സി കേരളക്ക് ഇനി മികച്ച രണ്ടാം സ്ഥാനക്കാരായി മാത്രമേ സെമി ഫൈനല്‍ റൗണ്ടിലെത്താനാകൂ. അതിന് ഗ്രൂപ്പ് എയിലെ മത്സരത്തില്‍ ഹിന്ദുസ്ഥാന്‍ എഫ്.സി പരാജയപ്പെടണം. പക്ഷെ മോശം കാലവസ്ഥ കാരണം ഡല്‍ഹിയില്‍ ഇന്നലെ നടക്കേണ്ടിയിരുന്ന മത്സരം മാറ്റിവച്ചിരിക്കുകയാണ്.