തിരുവനന്തപുരം: പി.എന്‍. പണിക്കരുടെ സ്മരണ പുതുക്കുന്നതിന് ജില്ലാ ഇന്‍ഫര്‍മേഷന്‍ ഓഫിസും പൊതുവിദ്യാഭ്യാസവകുപ്പും സര്‍വശിക്ഷാ അഭിയാനും തിരുവനന്തപുരം സാഹിതിയും സംയുക്തമായി സംഘടിപ്പിച്ച ജില്ലാതല വായനവാരാചരണ പരിപാടികള്‍ സമാപിച്ചു. കോട്ടണ്‍ഹില്‍ എല്‍.പി. സ്‌കൂളില്‍ സംഘടിപ്പിച്ച സമാപനസമ്മേളനവും സര്‍ട്ടിഫിക്കറ്റ് വിതരണവും കൊല്ലം അസി. കലക്ടര്‍ ആശ അജിത്ത് ഉദ്ഘാടനം ചെയ്തു.  കഥാകൃത്തും പത്രപ്രവര്‍ത്തകനുമായ ബി. മുരളി മുഖ്യാതിഥിയായി.
19 ന് ശിശുക്ഷേമസമിതിയില്‍ ചലച്ചിത്രതാരം സുധീര്‍ കരമന   ഉദ്ഘാടനം ചെയ്ത വാരാചരണത്തില്‍ ജില്ലയിലുടനീളം പല പരിപാടികള്‍ സംഘടിപ്പിച്ചു.  വിദ്യാഭ്യാസമന്ത്രി സി. രവീന്ദ്രനാഥ് പങ്കെടുത്ത വായനയ്ക്ക് ഒരു മണിക്കൂര്‍, പ്രശസ്ത കവി വി. മധുസൂദനന്‍ നായരുടെ വസതിയില്‍ പങ്കെടുത്ത ഗുരുസന്നിധിയില്‍ തുടങ്ങിയ പരിപാടികള്‍ വിദ്യാര്‍ത്ഥികളുടെയും അധ്യാപകരുടെയും രക്ഷകര്‍ത്താക്കളുടെയും പങ്കാളിത്തംകൊണ്ട് ശ്രദ്ധേയമായി.  ബ്ലോക്ക് തലത്തില്‍ നടന്ന വായനമത്സരത്തില്‍ 72 പേര്‍ വിജയികളായി. വിജയികള്‍ക്ക്  സമാപന സമ്മേളനത്തില്‍  സര്‍ട്ടിഫിക്കറ്റുകള്‍ വിതരണം ചെയ്തു.