റിയാദ്: സഊദി അതിര്‍ത്തി മേഖലയായ ജിസാന്‍ ലക്ഷ്യമാക്കി യമനിലെ ഹൂതി വിമത വിഭാഗം മിസൈല്‍ ആക്രമണം നടത്തി. വെള്ളിയാഴ്ച വൈകുന്നേരമാണ് ആക്രമണം നടന്നത്. എന്നാല്‍ സഊദി അതിര്‍ത്തി രക്ഷാ സേന ആകാശത്തു വെച്ച് തന്നെ മിസൈല്‍ പ്രതിരോധ ഉപകരണം ഉപയോഗിച്ച് തകര്‍ത്തതായി സഊദിവാര്‍ത്താ ഏജന്‍സി റിപ്പോര്‍ട്ട് ചെയ്തു. ആക്രമണത്തില്‍ അപകടങ്ങളോ മറ്റോ ഉണ്ടായതായി റിപ്പോര്‍ട്ട് ചെയ്തിട്ടില്ല

സഖ്യസേനയുടെ യുദ്ധകപ്പല്‍ തകര്‍ക്കാനായി കുതിച്ചെത്തിയ മൂന്നു ബോട്ടുകളും സഖ്യസേന തകര്‍ത്തു. വ്യാഴാഴ്ച്ച രാത്രിയാണ് ചെങ്കടലില്‍ യമനിനോട് ചേര്‍ന്ന് കിടക്കുന്ന സഖ്യ സേന യുദ്ധകപ്പല്‍ ലക്ഷ്യമാക്കി ഹൂതികള്‍ ബോട്ടിലെത്തിയത്. എന്നാല്‍, യഥാസമയത് ഇടപെട്ട അറബ് സഖ്യ സേന ബോട്ടുകള്‍ തടയുകയും ചിലരെ പിടികൂടുകയുമായിരുന്നു.

നേരത്തെയും യമനില്‍ യുദ്ധത്തിലേര്‍പ്പെട്ട സഖ്യസേനയുടെ കപ്പലിന് നേരെ ഹൂതികള്‍ ആക്രമണം നടത്തിയിരുന്നു. കൂടാതെ ഇവിടെ നങ്കൂരമിട്ട അമേരിക്കന്‍ യുദ്ധ കപ്പലിന് നേരെയും കഴിഞ്ഞ മാസം ആക്രമണം നടന്നിരുന്നു. മറ്റൊരു ആക്രമണത്തില്‍ സഖ്യ സേനയുടെ നായകത്വം വഹിക്കുന്ന സഊദിയുടെ യുദ്ധ കപ്പല്‍ ആക്രമണത്തില്‍ സഊദി നാവിക സൈനികര്‍ വീരമൃത്യു വരിക്കുകയും കപ്പലിന് സാരമായ കേടുപാടുകള്‍ നശിപ്പിക്കുയും ചെയ്തിരുന്നു.