തിരുവനന്തപുരം: മലപ്പുറം ഉപതെരഞ്ഞെടുപ്പിനായുള്ള സി.പി.എം സ്ഥാനാര്‍ഥിയെ ഇന്ന് പ്രഖ്യാപിക്കും. സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണനാണ് പ്രഖ്യാപനം നടത്തുക. ഇന്ന് ചേരുന്ന ജില്ലാ കമ്മിറ്റി യോഗത്തിലാവും ഇക്കാര്യത്തില്‍ അന്തിമതീരുമാനമെടുക്കുക.

ജില്ലാ കമ്മിറ്റി യോഗത്തില്‍ സിപിഐഎം സംസ്ഥാന സെക്രട്ടറി കോടിയേരി ബാലകൃഷ്ണന്‍, കേന്ദ്രക്കമ്മിറ്റി അംഗം എ വിജയരാഘവന്‍ എന്നിവര്‍ പങ്കെടുക്കും.

മലപ്പുറത്ത് ലീഗ് സ്ഥാനാര്‍ഥിയായി പി.കെ കുഞ്ഞാലിക്കുട്ടിയെ പ്രഖ്യാപിച്ച സാഹചര്യത്തില്‍ കരുത്തനായ സ്ഥാനാര്‍ഥിയെ തന്നെയാകും സി.പി.എമ്മും രംഗത്തിറക്കുക. മുന്‍ എം.പി ടി.കെ ഹംസ, കര്‍ഷകസംഘം നേതാവ് ടികെ റഷീദലി, ഡിവൈഎഫ്‌ഐ ജില്ലാ പ്രസിഡന്റ് എം ബി ഫൈസല്‍ എന്നിവരുടെ പേരാണ് സാധ്യതാ പട്ടികയിലുള്ളത്.

ബിജെപി മലപ്പുറം ജില്ലാ വൈസ് പ്രസിഡന്റ് എന്‍. ശ്രീപ്രകാശാണ് ബിജെപി സ്ഥാനാര്‍ത്ഥി. കേന്ദ്ര തെരഞ്ഞെടുപ്പ് സമിതിയാണ് ശ്രീപ്രകാശിന്റെ സ്ഥാനാര്‍ത്ഥിത്വം ഇന്നലെ പ്രഖ്യാപിച്ചത്.