കുന്ദമംഗലം: കുന്ദമംഗലം പഞ്ചായത്തിലെ കോരങ്കണ്ടി ചെറുവലത്ത് സത്യബേബിയും കുടുംബവും കീറിപ്പറഞ്ഞ പ്ലാസ്റ്റിക് ഷീറ്റ് വിരിച്ച മേല്‍ക്കൂരക്ക് ചുവട്ടിലാണ് അന്തിയുറങ്ങിയിരുന്നത്. കൂലിപ്പണിക്ക് പോകാന്‍ പോലും കഴിയാത്ത രോഗിയായ ഭര്‍ത്താവും മക്കളുമടങ്ങുന്ന ഈ നിര്‍ദ്ധന കുടുംബത്തിന് നാട്ടുകാരുടെ സഹായത്തോടെ സി.എന്‍.ഇ.എന്ന വാട്‌സ് ആപ്പ് കൂട്ടായ്മയുടെ നേതൃത്വത്തില്‍ മേല്‍ക്കൂരയുള്ള വീടൊരുങ്ങുകയാണ്. കുന്ദമംഗലം വൈദ്യുതി ബോര്‍ഡിലെ അസി.എന്‍ജീനിയര്‍ ടി.അജിതും സഹപ്രവര്‍ത്തകരും കഴിഞ്ഞ ദിവസം ഈ കുടുംബത്തിന് വയറിങ് ചെയ്ത് വൈദ്യുതി നല്‍കിയിരുന്നു.
ബേബിയുടെ കുടുംബത്തിന് വൈദ്യുതിയായി, ഇനിവേണ്ടത് ബലമുള്ള മേല്‍ക്കൂര എന്ന ശീര്‍ഷകത്തില്‍ സുപ്രഭാതം വാര്‍ത്ത പ്രസിദ്ധീകരിച്ചിരുന്നു. നിര്‍മാണ പ്രവൃത്തിയുടെ ഉദ്ഘാടനം വീട് നിര്‍മാണ കമ്മിറ്റി ചീഫ് കോഡിനേറ്റര്‍ അഡ്വ.ശ്രീജിത്കുമാര്‍ അരങ്ങാടത്ത് നിര്‍വഹിച്ചു. സി.എന്‍.ഇ ജനറല്‍ സെക്രട്ടറി സി.മനോജ് അധ്യക്ഷനായി. ഗ്രാമപഞ്ചായത്ത് അംഗം എം.ബാബുമോന്‍, എം.വി.ബൈജു, എം.കെ.മോഹന്‍ദാസ്, രവീന്ദ്രന്‍ കുന്ദമംഗലം എന്നിവര്‍ പ്രസംഗിച്ചു. വി.അനില്‍കുമാര്‍ സ്വാഗതവും സി.വി.ഗോപാലകൃഷ്ണന്‍ നന്ദിയും പറഞ്ഞു.