പൂച്ചാക്കല്‍: കക്കൂസ് മാലിന്യം പൊതുവായ സ്ഥലത്ത് തള്ളുന്നവരെ പിടികൂടാന്‍ യുവജന സ്‌ക്വാഡ് രൂപീകരിക്കുന്നു. ചേര്‍ത്തല-അരൂക്കുറ്റി റോഡില്‍ മാക്കേക്കടവ് മുതല്‍ പൂച്ചാക്കല്‍ വരെയുള്ള ഭാഗങ്ങളിലെ റോഡരികില്‍ കക്കൂസ് മാലിന്യങ്ങള്‍ തള്ളുന്നത് പതിവായ സാഹചര്യത്തിലാണ് ഡി.വൈ.എഫ്.ഐ തൈക്കാട്ടുശേരി മേഖലാ കമ്മിറ്റിയുടെ നേതൃത്വത്തില്‍ യുവജന സ്‌ക്വാഡ് രൂപീകരിക്കുന്നത്. മാലിന്യം തള്ളുന്ന ലോറികള്‍ പിടികൂടി അധികൃതരെ ഏല്‍പ്പിക്കും. രാത്രികാലങ്ങളില്‍ ലോറികളില്‍ എത്തിക്കുന്ന മാലിന്യം റോഡരികിലെ ഒഴിഞ്ഞ പ്രദേശങ്ങളിലും ജനവാസമേഖലകളിലുമാണ് തള്ളുന്നത്. മഴക്കാലമായതോടെ ഇതു പരിസരമാകെ വ്യാപിക്കുകയും ഒഴുകി ജലാശയങ്ങളിലേക്കും മറ്റും എത്തുകയും ചെയ്യുന്നു. ഇതുമൂലം പകര്‍ച്ചവ്യാധികള്‍ പടരാനുള്ള സാധ്യതയും ഏറെയാണ്.