കോഴിക്കോട്: അഗതി രഹിത കേരളമെന്ന മഹത്തായ സ്വപ്നം സാക്ഷാത്ക്കരിക്കുന്നതിന് കുടുംബശ്രീ പ്രവര്‍ത്തകര്‍ മുന്നിട്ടിറങ്ങിയതായും ജൂലൈയില്‍ പദ്ധതി പ്രവര്‍ത്തനം ആരംഭിക്കുമെന്നും തദ്ദേശ സ്വയംഭരണ- ന്യൂനപക്ഷ ക്ഷേമ മന്ത്രി ഡോ.കെ.ടി ജലീല്‍. കുടുംബശ്രീയുടെ 20-ാം വാര്‍ഷികാഘോഷം കോഴിക്കോട് സ്വപ്ന നഗരിയില്‍ ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.
'അഗതി രഹിത കേരളം' പദ്ധതി നടപ്പാകുന്നതോടെ ഭക്ഷണം കിട്ടാത്തതോ ഉടുക്കാന്‍ വസ്ത്രം ഇല്ലാത്തതോ കുട്ടികള്‍ക്ക് പഠനോപകരണങ്ങള്‍ ഇല്ലാത്തതോ പ്രാഥമിക മരുന്ന് ലഭ്യമല്ലാത്തതോ ആയ ഒരു കുടുംബവും കേരളത്തില്‍ ഉണ്ടാവില്ലെന്ന് മന്ത്രി പറഞ്ഞു. പദ്ധതിക്കുള്ള സര്‍വെ ഇതിനകം പൂര്‍ത്തിയാക്കി. ചെലവിന്റെ 40 ശതമാനം കുടുംബശ്രീ മുഖേന സര്‍ക്കാര്‍ വഹിക്കും.
60 ശതമാനം ഗ്രാമ- ബ്ലോക്ക്- ജില്ലാ പഞ്ചായത്തുകളും നഗരസഭകളും വഹിക്കണം. കുടുംബശ്രീക്കു കീഴില്‍ 200 ബഡ്‌സ് സ്‌കൂളുകള്‍ ഈ വര്‍ഷം തുടങ്ങുമെന്നും യോഗ്യരായ കുടുംബശ്രീ അംഗങ്ങള്‍ക്ക് ഇവിടത്തെ ജോലികളില്‍ മുന്‍ഗണന നല്‍കുമെന്നും മന്ത്രി അറിയിച്ചു. പുതിയ തലമുറയിലെ വിദ്യാസമ്പന്നയായ ഒരു വനിതയെ കൂടി ഓരോ കുടുംബത്തില്‍ നിന്നും ഈ വര്‍ഷം കുടുംബശ്രീയില്‍ അംഗങ്ങളായി ഉള്‍പ്പെടുത്തും. ഇതോടെ ഒരു കോടിയോളം സ്ത്രീ പ്രാതിനിധ്യമുള്ള മഹാ പ്രസ്ഥാനമായി കുടുംബശ്രീ മാറുമെന്ന് മന്ത്രി പറഞ്ഞു.
ഹര്‍ഷം ജെറിയാട്രിക് കെയര്‍ പദ്ധതിയുടെ ഉദ്ഘാടനവും കുടുംബശ്രീയുടെ കഥ പ്രകാശനവും മന്ത്രി നിര്‍വഹിച്ചു. എ. പ്രദീപ്കുമാര്‍ എം.എല്‍.എ അധ്യക്ഷനായി. ഗതാഗത മന്ത്രി എ.കെ ശശീന്ദ്രന്‍ മികച്ച സി.ഡി.എസുകളെ ആദരിച്ചു. കൃഷി മന്ത്രി വി.എസ് സുനില്‍കുമാര്‍, എം.എല്‍.എമാരായ ഇ.കെ വിജയന്‍, പുരുഷന്‍ കടലുണ്ടി, മുന്‍ എം.പി ഡോ.ടി.എന്‍ സീമ, മുക്കം നഗരസഭാ ചെയര്‍മാന്‍ കുഞ്ഞന്‍, കുടുംബശ്രീ എക്‌സിക്യൂട്ടീവ് ഡയരക്ടര്‍ എസ്. ഹരികിഷോര്‍, ഗവേണിങ് ബോഡി അംഗം എ.കെ രമ്യ, ജില്ലാ മിഷന്‍ കോര്‍ഡിനേറ്റര്‍ പി.സി കവിത സംബന്ധിച്ചു. വാര്‍ഷികാഘോഷം ഇന്ന് സമാപിക്കും.