കോവളം: അമിത വേഗതയിലെത്തിയതിനെ തുടര്‍ന്ന് പിഴയടയ്ക്കാന്‍ നിര്‍ദേശിച്ച ഉദ്യോഗസ്ഥരോട് അപമര്യാദയായി പെരുമാറിയ വാഹനത്തിന്റെ ഡ്രൈവറെ തിരുവല്ലം പൊലിസ് അറസ്റ്റു ചെയ്തു.
അരുവിക്കര അഴീക്കോട് സ്വദേശി ഷെഫീക്ക് (29) നെയാണ് അറസ്റ്റു ചെയ്തത്. ഇന്നലെ ഉച്ചയ്ക്ക് 2 ഓടെ വാഴമുട്ടം
ബൈപാസില്‍ തിരുവല്ലം ഭാഗത്തു നിന്നും കോവളം ഭാഗത്തേയ്ക്ക് അമിത വേഗതയില്‍ എത്തിയ ഇയാളുടെ കാറിനെ ബൈപാസില്‍ വാഹന പരിശോധന നടത്തുകയായിരുന്ന ഉദ്യോഗസ്ഥര്‍ ഡ്രൈവറോട് വാഹനത്തിന്റെ രേഖകളും നല്‍കാന്‍ ആവശ്യപ്പെട്ടു.
എന്നാല്‍ കാര്‍ ഡ്രൈവര്‍ ഇതിന് തയാറായില്ല. ഒടുവില്‍ ഉദ്യോഗസ്ഥരോട് അപമര്യാദയായി പെരുമാറുകയും പിടിച്ചു തള്ളുകയും ചെയ്തു. സംഭവത്തെ തുടര്‍ന്ന് ഇയാളെ തിരുവല്ലം പൊലിസ് അറസ്റ്റു ചെയ്യുകയായിരുന്നു. ഉദ്യോഗസ്ഥര്‍ക്കെതിരേ
അപമര്യാദയായി പെരുമാറിയതിനും ഔദ്യോഗിക ജോലി നിര്‍വഹണം തടസപ്പെടുത്തിയതിനുമെതിരേ ഇയാള്‍ക്കെതിരേ കേസെടുത്തതായി തിരുവല്ലം പൊലിസ് പറഞ്ഞു. അറസ്റ്റു ചെയ്ത പ്രതിയെ ഇന്ന് കോടതിയില്‍ ഹാജരാക്കും.