കണ്ണൂര്‍: എസ്.കെ.എസ്.എസ്.എഫ് സഹചാരി ജില്ലാകമ്മിറ്റിയുടെ കീഴില്‍ നടത്തുന്ന റമദാന്‍ പ്രഭാഷണം നാളെ മുതല്‍ 27വരെ കണ്ണൂര്‍ താണ സാധുകല്യാണ മണ്ഡപത്തിനു സമീപം തയാറാക്കിയ 'ബാബു റയ്യാനില്‍' നടക്കും. തുടര്‍ച്ചയായി എട്ടാംവര്‍ഷമാണു പ്രഭാഷണം നടന്നുവരുന്നത്. ആതുരസേവന സഹായ മേഖലയിലെ പ്രവര്‍ത്തനങ്ങള്‍ ഊര്‍ജിതമാക്കുന്നതിനായി രൂപീകരിച്ച സംവിധാനമാണു സഹചാരി. പാപ്പിനിശ്ശേരി എം.എം ആശുപത്രിയില്‍ ഏഴുവര്‍ഷമായി നടന്നുവരുന്ന ഡയാലിസിസും നിര്‍ധന രോഗികള്‍ക്കുള്ള മരുന്നുവിതരണവും സൗജന്യ നിരക്കില്‍ ആംബുലന്‍സും സഹചാരിയുടെ പദ്ധതികളുടെ ഭാഗമായി നടന്നുവരുന്നുണ്ട്. നാളെ രാവിലെ 8.30ന് സമസ്ത ജനറല്‍ സെക്രട്ടറി കെ. ആലിക്കുട്ടി മുസ്‌ലിയാര്‍ ഉദ്ഘാടനം ചെയ്യും. പി.കെ.പി അബ്ദുസലാം മുസ്‌ലിയാര്‍ അധ്യക്ഷനാകും. നാളെ മുതല്‍ 22 വരെ റഹ്മത്തുല്ല ഖാസിമി മുത്തേടമാണു പ്രഭാഷണം നടത്തുന്നത്. 22, 24 തിയതികളില്‍ സിറാജുദീന്‍ അല്‍ഖാസിമിയും 25നു സിംസാറുല്‍ ഹഖ് ഹുദവിയും 26നു സിദ്ദീഖ് അല്‍ അസ്ഹരിയും പ്രഭാഷണം നടത്തും. 27നു സമാപനം സമസ്ത കേന്ദ്ര സെക്രട്ടറി പി.പി ഉമര്‍ മുസ്‌ലിയാര്‍ ഉദ്ഘാടനം ചെയ്യും. തുടര്‍ന്നു കൂട്ടുപ്രാര്‍ഥനയ്ക്കു കേന്ദ്ര മുശാവറ അംഗം മാണിയൂര്‍ അഹ്മദ് മുസ്‌ലിയാര്‍ നേതൃത്വം നല്‍കും.