കടുത്തുരുത്തി:മധുരവേലി പ്രാഥമികാരോഗ്യകേന്ദ്രത്തില്‍ ആരംഭിച്ച ലബോറട്ടറി അടച്ചു പൂട്ടിയിട്ട് ആറ് മാസം.ലക്ഷങ്ങള്‍ വിലയുള്ള ഉപകരണങ്ങള്‍ തുരുമ്പിച്ച് നശിക്കുന്നു.
നിര്‍ദ്ധനരായ രോഗികള്‍ പരിശോധനകള്‍ക്കായി സ്വകാര്യ ലബോറട്ടറികളില്‍ പണം മുടക്കി പരിശോധനകള്‍ നടത്തി വലയുന്നു. കടുത്തുരുത്തി പഞ്ചായത്തിന്റെ നിയന്ത്രണത്തിലുള്ള പ്രാഥമികാരോഗ്യ കേന്ദ്രത്തിലെ സ്ഥിതിയാണിത്.ടെക്‌നീഷ്യന്‍ ഇല്ലാത്തതാണ് ലാബ് അടച്ചുപൂട്ടാന്‍ കാരണം. താല്‍ക്കാലികമായി നിയമിച്ചിരുന്ന ടെക്‌നീഷ്യന്‍ ശബളം കുറവായതിനാല്‍ ജോലി ഉപേക്ഷിച്ച് പോയതിന് ശേഷം ലാബ് തുറന്നിട്ടില്ല. നാല് വര്‍ഷം മുന്‍പ് ആരംഭിച്ച ലബോറട്ടറിയില്‍ ലക്ഷങ്ങള്‍ വിലയുള്ള ഉപകരണങ്ങള്‍ ജില്ലാ മെഡിക്കല്‍ ഓഫീസില്‍ നിന്നും ലഭിച്ചിരുന്നു.റ്റി.ബി, ടെങ്കിപനി പരിശോധനകളടക്കം എല്ലാ വിധ പരിശോധനകളും ഇവിടെ നടത്തിയിരുന്നു. കടുത്തുരുത്തി പഞ്ചായത്തിന്റെ പടിഞ്ഞാറന്‍ പ്രദേശങ്ങളിലുള്ളവരും മുണ്ടാര്‍ സ്വദേശികളായ രോഗികളും ആശ്രയിക്കുന്ന ആതുരാലയമാണ് മധുരവേലി പ്രാധമികാരോഗ്യകേന്ദ്രം.
ദിവസവും നൂറിലധികം രോഗികള്‍ ഇവിടെ ചികിത്സ തേടിയെത്തുന്നുണ്ട്. ലാബ് അടച്ചു പൂട്ടിയതോടെ രോഗികള്‍ ആയാംകുടി, കടുത്തുരുത്തി, കല്ലറ, കുറുപ്പംതറ തുടങ്ങിയ സ്ഥലങ്ങളിലെത്തി പണം നല്‍കി പരിശോധന നടത്തി റിസല്‍ട്ടുമായി ഡോക്ടറെ കാണേണ്ട ദുരിതത്തിലാണ്.പ്രാഥമികാരോഗ്യകേന്ദ്രത്തില്‍ എച്ച്.എം.സി കമ്മറ്റികള്‍ കൃത്യമായി കൂടാറില്ലെന്ന് പറയുന്നു.ജില്ലാ പഞ്ചായത്തില്‍ നിന്നും അഞ്ച് ലക്ഷം രൂപ അനുവദിച്ചാണ് ലാബിനായി കെട്ടിടം നിര്‍മ്മിച്ചത്. ലാബ് കെട്ടിടത്തിന്റെ ഒരു ഭാഗത്ത് തുടര്‍ സാക്ഷരതാ കേന്ദ്രം പ്രവര്‍ത്തിക്കുകയാണ്. എല്ലാവിധ സജ്ജീകരണങ്ങളുള്ള ലാബില്‍ ഒരു ടെക്‌നീഷ്യനെ നിയമിച്ചാല്‍ ലാബ് പ്രവര്‍ത്തിപ്പിക്കുവാന്‍ കഴിയും. എന്നാല്‍ പഞ്ചായത്ത് ഇക്കാര്യത്തില്‍ ഒരു നടപടിയും സ്വീകരിക്കാന്‍ തയ്യാറായില്ല.
പല തവണ ലാബില്‍ ടെക്‌നീഷ്യനെ നിയമിക്കണമെന്ന് ആവശ്വപ്പെട്ടെങ്കിലും ചുതലയുള്ള ആരോഗ്യ സ്റ്റാന്റിംഗ് കമ്മിറ്റി യോ എച്ച്.എം.സി കമ്മറ്റിയോ കാര്യമായെടുത്തില്ലെന്നാണ് രോഗികളുടെ പരാതി. സ്വകാര്യ ലാബുകാരെ സഹായിക്കാനാണ് പ്രാഥമികാരോഗ്യ കേന്ദ്രത്തില്‍ എല്ലാ സൗകര്യങ്ങളുമുള്ള ലാബ് തുറന്ന് പ്രവര്‍ത്തിപ്പിക്കാന്‍ തയ്യാറാവാത്തതെന്നാണ് ആരോപണം.