മുതുകുളം: കോളേജ് പരിസരത്ത് കഞ്ചാവ് വില്‍പ്പന നടത്തിയ അന്യസംസ്ഥാനതൊഴിലാളി അറസ്റ്റില്‍. പശ്ചിമ ബംഗാള്‍ മാല്‍ഡാ സ്വദേശിയായ ഷേക്ക് യാക്കൂബ്(30) ആണ് ഇന്നലെ ഉച്ചക്ക് 12 മണിയോടെ കാര്‍ത്തികപ്പള്ളി എക്‌സൈസ് സംഘത്തിന്റെ പിടിയിലായത്.
കാര്‍ത്തികപ്പള്ളി ജംഗ്ഷനു കിഴക്ക് വശം ഐ.എച്ച്.ആര്‍.ഡി കോളേജിനു മുന്‍വശം വച്ചാണ് ഇയാളെ പിടി കൂടിയത്. വില്‍പനക്കായി കൊണ്ട് വന്ന 25 ഗ്രാം കഞ്ചാവും വില്‍പ്പന നടത്തി ലഭിച്ച 250 രൂപയും ഇയാളില്‍ നിന്ന് കണ്ടെടുത്തു.സ്‌കൂളുകള്‍ക്കും കോളജുകള്‍ക്കും സമീപം വിദ്യാര്‍ഥികള്‍ക്ക് സ്ഥിരമായി കഞ്ചാവ് വില്‍പ്പന നടത്തുന്നുണ്ട് എന്ന രഹസ്യവിവരത്തെ തുടര്‍ന്ന് നടത്തിയ അന്വേഷണത്തിലാണ് ഇയാളെ പിടികൂടിയത്.
കാര്‍ത്തികപ്പള്ളിയിലും സമീപപ്രദേശങ്ങളിലും ജോലി ചെയ്തിരുന്ന ഇയാള്‍ നാട്ടില്‍ പോയി തിരിച്ചെത്തിയിട്ട് ഇരുപത് ദിവസങ്ങള്‍ മാത്രമേ ആയിട്ടുളളൂ. കാര്‍ത്തികപ്പള്ളി ജംഗ്ഷനു വടക്കുഭാഗത്ത് വാടകക്ക് താമസിക്കുന്ന ഇയാളുടെ മുറിയും എക്‌സൈസ് സംഘം റെയ്ഡുചെയ്‌തെങ്കിലും ഒന്നും ലഭിച്ചില്ല.
കാര്‍ത്തികപ്പള്ളി എക്‌സൈസ് ഇന്‍സ്‌പെക്ടര്‍ ആര്‍.ജയരാജ്,അസിസ്റ്റന്റ് എക്‌സൈസ് ഇന്‍സ്‌പെക്ടര്‍ ലാലിക്കുട്ടന്‍ കെ.എസ്, പ്രിവന്റീവ് ഓഫീസര്‍ എസ്. മണിയനാചാരി,സി.ഇ.ഒ മാരായ അംബികേശന്‍,ആര്‍.വിനോദ്,പി.യു.ഷിബു,ഗോപകുമാര്‍,കെ.വി.സുരേഷ്,നൗഷാദ് എന്നിവരുടെ സംഘമാണ് അറസ്റ്റു നടത്തിയത്.